منی کامریڈیں سنگت
نبشتہ کار : فدا بلگتری بلوچ
دی بلوچستان پوسٹ
مئے کر ءَ سنگتے ءِ ستا چے اِنت؟ سنگتے ءِ اکلاکی کدر چے اِنت ءُ آ کجام پارمولا انت کہ پورا بہ بیت یک انسانے وتی زھنی پراڈاکساں سند اِیت ءُ مھکمیں سنگتے ءِ نیمگ ءَ سر بیت ۔
ارسٹوٹل گُشت اِیت دنیا ءِ تہ ءَ سنگتی ءِ سے دروشم انت یکے ھمیش انت کہ یک انسانے دومی ءِ پہ پائیدگ ءَ سنگتی کنت ایشی ءَ کارباری شکل ءُ مسال ءَ زروت کنیں ۔
دومی ھمیش انت کہ انسان مجبوری ءُ دباؤ ءِ شکل ءَ سنگتی کنت ایشی ءِ تہ ءَ انسان بازیں زاتی ءُ چاگردی لوٹاں مانپستگ اگاں اشی ءِ تہ ءَ ما مجبوری ءُ مسلھاں گورگیج بکن ایں سنگتی کُٹ ایت مانا ھتم بیت ھچ پشت نہ کپ ایت ۔
سیمی ھمیش انت کہ زاتی پائدگ ءُ نپاں چہ برزتر سرجمی selfish سنگتی کنگ آ چہ کُلیں چیزاں پاک انت بے مٹ انت آ دنیا ءِ تہ ءَ زیبا تریں بیرک ءِ آکس ءَ انت کہ ھرچ مھروانیں سنگت دوست لوٹ ایت اے منی (منی’ kasnoken) لائبریری ءِ کتابانی کباٹ ءِ بُرز ٹنگُگ بہ بیت ۔
مئے نزیک ءَ بازیں اَبرمی سیادی ھست اَنت ما زند ءِ گیشتریں ساھتاں ھمیشاں داتگ ءُ گُوازینتگ ءُ تجربہ کُتگ بلے مئے مجگ ءِ تہ ءَ اے وڑیں سنگتی ءِ آکس ءُ سان جوڑ نہ کُتگ چی ءَ کہ آیانی چاگردی لوٹ ءُ جیڑہ روانیں جاورانی نپ ءُ نکساں گوں بندوک انت ہرچ سیادی ءِ جند ءِ ارزشت چہ گیشتر زاتی پائدگ عزیز تِر اَنت اد ءَ الم سنگتی وڑیں بے پاکیں سیادی ساہ کشگ ءَ دم توس بنت۔ ادا نطشے کوٹ ءِ ایڈ کناں
” friends are valuable because of their difference bonus materials”
اگاں سادگیں بلوچی ءَ ایشی ءِ متلب ءَ بہ گُشاں منی نزّ ءَ اے وڑ بیت زندگی ءِ سپر وش کُتگ سنگتاں، سنگتی دنیا ءِ ھرچ شے ءَ گیشتر ارزشت دار اِیت، سنگتانی بے مٹیں مھر ءُ دلبڈی سکین دے اَنت ما اے نہ وشیں زند ءَ پہ شاد پُر امیدی ءَ گوزانیگ ءِ جُھد ءَ ایں۔
ھمے بے دروریں سنگتانی لڑ ءَ منی یکے وت ملنگیں سنگت چیدگ جان انت کہ مُدام زند ءِ گرانیں ساھت ءَ رژن ءِ بلُوکیں کندیل ءِ وڑ ءَ سیاہ شپ ءِ تھاریاں ھمراہ بیت ءُ یک نوک ءُ توانگریں منزل ءِ راہ پیش دار اِیت ، چوناھا چیدگ جان تو انچیں ارواہ ءِ مالکیں مردمے ئے کہ ترا سنگت ءُ انسان چہ مارا گیشتر مھر دیگ دوست بیت ۔
سنگتی ءَ رند تئی کر ءَ ھما سنگتی ءِ لوٹیانی سرجم کنگ ءِ مارشت ھست انت تو من ءَ ھور ءَ بازیں سنگتانی بے متلبیں زند ءَ شُوکیں مانا داتگ ۔اسل ءَ چیدگ جان من جیڑ آں تو اے مھرانی ءُ سنگت دوستی ءِ درس چہ کجام یونوسٹی ءُ وانگ جاھاں زُرتگ، من ھرچ وھد ءَ ھیالاں۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی ءِ اِنت–