بلوچستان ءِ دمگ کلات ءَ سَے براتانی زورانسری بیگواھی ءُ آیانی یل نہ کنگ ءِ ھلاپ ءَ یک رندے پد ءَ کھول ءَ زھرشانی کنان ءَ کراچی ءُ شال ءِ شھدگ ءَ نندانک داتگ ءُ بند کتگ-
گیشیں اھوالانی رد ءَ ھشت ءُ نُھ دسمبر ءِ میانی شپ ءَ پاکستانی پوج ءَ کلی زکریازئی منگچر ءَ ماسٹر مھمد اسماعیل ءِ لوگ ءِ سر ءَ بیڑ برتگ ءُ آئی ءِ سَے چُک مھبوب علی، ارشاد اھمد ءُ مرید اھمد زورانسری آوار جتگ اَنت-
زورانسری بیگواھی ءِ ھلاپ ءَ کھول ءَ ایشی ءَ پیش نُھ دسمبر ءَ شال کراچی ءِ شھدگ منگچر ءِ ھند ءَ زھرشانی ءَ بند کتگ ات- انتزامیہ ءِ گون ءَ گپ ءُ تران ءُ سدکی ءَ پد زھرشانی مھتل کنگ بیتگ ات-
کھول ءِ رد ءَ اسسٹنٹ کمشنر ءُ ڈپٹی کمشنر کلات ءَ دو روچانی مھلت لوٹ اتگ کہ آیانی مردماں یل دنت اِنت بلے دو روچانی گوزگ ءَ پد ھم آیانی مردم یل نہ بیتگ اَنت-
کھول ءِ رد ءَ بیگواھیں مرید اھمد سر ءَ نیم ساریں مردمے – آ یک ماھے ءَ ھسپتال ءَ بوگ ءَ پد لھتے روچاں پیش ھسپتال ءَ ڈسچارج بیتگ-
کھول ءِ گوشگ اِنت آیانی یل کنائینگ ءَ لاچاری ھمیش اِنت زھرشانی ءَ شال ءُ کراچی ءِ شھدگ بند کتگ –
کھول ءِ گوشگ اِنت کہ آیانی یل کنگ ءَ داں زھرشانی برجاہ بیت اِنت – آیاں بلوچ راج ءَ گیشتر منگچر ءِ مھلوک ءَ دزبندی اِنت کہ اے مشکلیں وھد ءَ مئے گون ءَ ھمراھداری بہ کن ات-