یکشمبے ءِ روچ ءَ بلوچستان ءِ دمگ قلعہ عبداللہ ءَ لیویز پورس ءِ گاڑی دیسی بمبے ءِ نشانگ کنگ بیتگ – تراک ءَ گاڑی ءَ تاوان رس اتگ-
ڈپٹی کمشنر چمن ھبیب اھمد بنگلزئی ءَ تراک ءِ ھال راست کنان ءَ گوشتگ اے وئیل ءَ ھچ جانی تاوان نہ بیتگ-
سرکاری اھوالانی رد ءَ ناشناسیں مردماں اے بمب چیر کتگ کہ لیویز پورس ءِ گاڑی گوزگ ءِ وھد ءَ ترک اتگ – واکداراں اُرش ءِ پٹ ءُ پول بندات کتگ اَنت-
اے وئیل ھمے ھپتگ ءِ بندات ءَ بیتگیں یک اُرشے ءَ پد بیتگ – چریشی ءَ دمگ ءِ لیویز ءِ یک دگہ گاڑی ءِ نشانگ کنگ بیتگ ات کہ ءُ یک مردمے زدگ بیتگ ات-
بلوچستان ءِ سیکیورٹی واکداراں پورسز ءِ سر ءَ گیش بوھوکیں اُرشاں پدردی ءِ درشان کنان ءَ گوشتگ دمگ ءَ گیش سیکیورٹی گامگیج ءِ مھکم کنگ ءِ درکاری اِنت – بلے داں انگت ءَ ھچ ٹولی ءَ اے اُرش ءِ زمہ واری پہ وت نہ زرتگ-