مکران ءَ ایرانی تیل ءِ باپاری ءَ گوں ھمگرنچیں مردمانی گْوشگ اِنت کہ فرنٹیئر کور ( ایف سی ) تیل کشیں گاڑیانی واھننداں چمپروشی کنگ ءَ اِنت کہ آ آیانی واستا کار بہ کن اَنت-
آیانی گوشگ اِنت کہ ایف سی ءَ بیھار داتگ کہ اگاں تیل کشیں گاڑیانی واھنند آیانی پرمانانی سر ءَ کار نہ کن اَنت گُڑا آیانی گاڑیاں روکپتی بلوچستان ءَ تاں تیل آرگ موکل ندنت-
اِھوالکار رِد ءَ ایف سی ءَ ھمے مول ھاتر ءَ مکران ءِ سرجمیں تیل باپاری مردمانی جُست پُرس بندات کتگ-
چہ کیچ ءَ یک گاڑی واھنندے ءَ گوشتگ کہ ایف سی گمان اِنت کہ مزنیں لشکر کشی ءَ چن ءُ لانچ کنگ ءَ اِنت ءُ اے درگت ءَ آ لوٹ اِیت تیل کشیں گاڑیانی واھنند آیانی واستا کمکاری ءِ کار ءَ بہ کن اَنت-
آئی ءَ دیمتر ءَ گوشتگ کہ دمگی انتزامیہ زور دیگ ءَ اِنت کہ آ تیل کشیں گاڑیانی واھننداں چار ءُ ٹپاس کنگ ءَ تیار بہ کن اَنت پرچاکہ بازیں تیل کشیں گاڑیانی واھننداں ایف سی نیمگ ءَ لوٹائینگ آیاں گوں گند ءُ نند ءَ انکار کتگ-