بلوچ راج ءِ انسانیت سوزمان ءُ پدریچ کشوکانی مھار یل اَنت- بی وائی سی

بلوچ یکجھتی کمیٹی ءِ جارکش ءَ گوشتگ کہ بلوچ راج ءِ انسانیت سوزمان ءُ پدریچ کشوکانی مھار یل انت انچشکہ بلوچستان ءَ زورانسری آوار جنی ءُ درکانودی کوش ءِ تُرندی ءَ چہ پدر اِنت-

آئی ءَ گْوشتگ کہ بی وائی سی عابد حسین ء غلام حسین ءُ مست خان ء گھور خان لوٹانی ءِ ناھکیں کوش ءَ تُرندی ءَ ایر جن ایں کہ ھشت سال ءَ ساری ھُزدار ءَ روگ ءَ بیتگ اَنت کہ پاکستانی پوج ءَ آوار جتگ اَنت، آیانی لاش گزان کوچو، چہ ھُزدار ءَ دزکپتگ اَنت، اود ءَ یک کاگدے دور داتگ آئی ءِ سر ءَ آیانی پجّار نبشتہ بیتگ دانکہ کھول مردم پجّار ءِ بہ کن اَنت-

جارکش ءَ گْوشتگ کہ درکانودی کوش ءِ دگہ یک کیسے فقیر جان ء سید محمد جھمنند کنری بزداد، دو ستمبر دوھزار بیست چار ءَ زورانسری بیگواہ کتگ، ءُ عصاء بلوچ ء نور دین جھمنند پاھو کہ ھپدہ فروری دوھزار بیست سے ءَ آوار جتگ – دوئیں سی نومبر دوھزار بیست چار ءَ یک دروگیں میڑے ءَ جتگ اَنت، پاکستانی پوج ءَ آیانی ٹپ ٹوریں لاش آواران کور کش ءَ دور داتگ اَنت-

آئی ءَ گْوشتگ کہ اے زالمیں کاروائی بلوچانی برجاھیں درانسانی ءُ تچکی ءَ نشانگ کنگ ءَ پدر کنت – انساپ ءِ دیگ ھژدری اِنت، ءُ میارباراں جنگی جرم ءُ انسانیت ھلاپ ءَ جرم ءِ ھاتر ءَ جُست بگر اَنت – ما میان استمانی مردم ءُ گلاں زور دے ایں کہ کم چہ کم جرم ءُ انسانی ھکانی ھلاپ ورزی ءَ دیم ءَ بیار اَنت-

جارکش بی وائی سی ءَ گوشتگ کہ بلوچ راج ءِ واستا اے زوراکی ءِ پروشگ ءِ یکیں راہ راجی گھگیری اِنت-