چہ بلوچستان ءَ دگہ دو مردم ءِ لاش دزکپتگ اَنت ، بیست چار کلاکانی تہ ءَ شش لاش دزکپتگ-
شال ءِ دمگ چہ خروٹ آباد ءَ یک ماھے ءَ ساری بیگواہ کنگ بیتگیں بچک امان اللہ ء طاؤس ءِ لاش نوحصار کوھاں چہ دزکپتگ-
دمگی انتزامیہ ءَ لاش دستگیں کتگ چار ٹپاس ھاتر ءَ نادُراھجاہ ءَ برتگ-
ھمے وڑ کیچ ءِ دمگ کلگ ءِ جھمنندیں یک پیرزالیں زالبولے کہ یکشمبے ءِ بیگاہ ءَ علی آباد ءِ راہ ءَ گار بیتگ اَت، آئی ءِ لاش دوشمبے ءِ سُھب ءَ لیویز فورس ءَ دزکپتگ ءُ کھول ءَ داتگ-
ھمے ھپتگ ءَ چہ تربت ءَ اے دومی زالبول لاش اِنت-
بیست چار کلاکانی تہ ءَ شش لاش دزکپتگ اَنت-
گوستگیں بیست چار کلانی تہ ءَ بلوچستان ءِ جتاجتائیں دمگاں چہ شش لاش دزکپتگ اَنت – دوشمبے ءَ ھُزدار ءِ دمگ چہ زھری ءَ ھشت سال ءَ ساری بیگواہ کنگ بیتگیں عابد حسین ءُ مستی خان لاش دزکپتگ اَنت، وھدے کہ یکشمبے ءَ چہ آواران ءَ فقیر جان ءُ عیسیٰ نامیں دو مردمانی لاش دزکپتگ اَنت- کہ دیریں مدتے ءَ بیگواہ بیتگ اَنت-
بلوچستان ءَ پجّار نہ بیتگیں ءُ ٹپ ٹوریں لاشانی دزکپگ انسانی ھکانی واستا یک بلاھیں جیڑھے جوڑ بیتگ، بلے ھکومتی ادارھانی نیمگ ءَ ھچ وڑیں درشان دیم ءَ نیتکگ-