بلوچ سیاست ءِ دلبند کیچ ءَ سباء لٹریری فیسٹیول ءِ اڈ دیگ ءُ بلوچ مھلوک ءِ اے کساس ءَ بھر زیرگ ءُ شرپ بکشائیگ بلوچ چاگرد ءَ راج دوستی، زانشت دوستی ءُ سیاسی سِنچ ءُ سما ءِ برورد اِنت۔بلوچ اسٹوڈنٹس ایکشن کمیٹی
شنگ بیتگیں درشان ءَ گوشگ بیتگ کہ بلوچ سیاست ءِ دلبند کیچ ءَ دو روچی مراگاہ سباء لٹریری فیسٹیول کیچ ءَ سوبمندی ءَ گوں برجم دارگ بوتگ، دو روچی مراگاہ ءَ جتا جتائیں زانت ءُ زانشتی بھر ھوار بیتگ اَنت ۔ عطاء شاد ڈگری کالج تربت ءَ برجم داشتگیں مراگش دو روچ ءَ 30 نومبر داں 1 دسمبر ءَ جنزی اتگ کہ آیانی تہ ءَاولی روچ ءَ جتاجتائیں سرھالانی سر ءَ گُشتانک، پینل ڈسکشن، ڈاکیومنٹری، کسمانک ءُ ٹیبلو ءَ ھوار شئیر ءُ شائری ءُ ساز ءُ زیمل ھوار بیتگ اَنت۔
درشان ءَ گوشگ بیتگ مراگاہ ءِ اولی روچ چہ بلوچ راجی سوت ءَ بندات کنگ بوتگ ءُ دیمتر ءَ نمیرانیں واجہ سباء ءِ زِند ءُ ازم ءِ سر ءَ بالاچ بالی ءَ گشتانک داتگ ءُ چہ آئی ءَ پد وانگی نزام ،لبزانک ءُ رسانکدر ءِ سر ءَ جتا جتا پینل ڈسکشن بیتگ اَنت کہ آیانی تہ ءَ اولی ءِ مھمان ءُ مھمان دار ساھر اسحاق ءُ دلاور بیتگ اَنت ، اھدی لبزانک ءِ مھمان غفور شاد بیتگ کہ آئی ءِ مھمان داری جمال منظور ءَ کتگ ، رسانکدر ءِ سرھال ءِ سر ءَ مھمان عابد سنگُر بیتگ ءُ آئی ءِ مھمانداری بساک ءِ بنجاھی ھالرسانی کارگُشاد اُزیر بلوچ ءَ کُتگ-
شنگ بیتگیں درشان ءَ گوشگ بیتگ کہ دو ڈاکومینٹری یکے واجہ سباء دشتیاری ءُ دومی نمیرانیں مبارک قاضی ءِ سر ءَ پیش کنگ بوتگ انت،چہ بساک تربت ھنکین ءِ نیمگ ءَ کسمانک ءُ ٹیبلو پیش کنگ بوتگ انت، رسانکدر ءِ سر ءَ پریزنٹیشنے چہ جاوید مولا بخش ءِ نیمگ ءَ پیش کنگ بوتگ ءُ ایشاں ھوار شئیر ءُ شائری ءِ بھر ھوار بیتگ اَنت ءُ گڈی بھر ءَ اھدی ساز ءُ زیمل ءِ بھرے ھوار بیتگ کہ آئی ءِ تہ ءَ شاکر زامرانی ءُ ھیال مبارک ءَ وشتواری ءَ گوں زھیرونک الھان کتگ انت ءُ عارف مزار ءَ سروز جتگ ءُ دیوان ءَ پُرمڑاہ کُتگ۔
بلوچ اسٹوڈنٹس ایکشن کمیٹی ءَ گوشتگ کہ مراگاہ ءِ دومی روچ 1 دسمبر ءَ گوں بلوچ راجی سوت ءَ بندات کنگ بوتگ، دومی روچ ءَ واجہ سباء دشتیاری ءِ سر ءَ نبشتگیں پنتاک مختار نور ءَ ونتگ ءُ ایشی ءَ ھوار سئے پٹ ءُ پولی تاک رسانکدر ءُ بلوچ مھلوک ءِ زمہ واری بساک ءِ بنجاھی ھالرسانی کارگُشاد اُزیر بلوچ،دانشورانی کردار ءُ بلوچ دانشور ءِ سر ءَ تاک چہ گُلاب گُلزار ءُ جھان ءِ مٹ بیوکیں سیاست ءِ سر ءَ تاک تربت ھنکین ءِ کارگُشاد نوروز بلوچ ءِ نیمگ ءَ وانگ بوتگ اَنت۔ تربت ھنکین ءِ نیمگ ءَ گام ءِ سر ءَ کسمانکے پیش کنگ بوتگ ءُ واجہ سباء ءِ زِند ءُ ازم ءَ ھوار وانگی نزام ءِ سر ءَ دو ڈاکومنٹری پیش دارگ، دو پینل ڈسکشن ھوار بیتگ انت کہ اولی ءِ سرھال اُلسی لبزانک ءَ مھمان بانک ھورس بلوچ ءُ عمرانہ بلوچ بیتگ انت کہ آھانی مھمانداری بانک اسماء بلوچ ءَ کتگ، دومی ءِ سرھال موڈرنزم ءُ بلوچی لبزانک ءِ سرھال ءِ مھمان مجیب آزاد، سالم مجید، راشد ھسرت بیتگ انت ءُ مھماندار رضوان فاخر بیتگ، ھمے پیم ریسرچ میتھوڈولجی ءِ سر ءَ ڈاکٹر زھیر شیران ءِ گُشتانک، بلوچ اھوالکار کیّا بلوچ ءِ آنلائن گُشتانک ءَ ھوار احسان دانش ءِ ٹیم ءَ بلوچ چاگرد ءِ جیڑھانی سر ءَ کسمانکے پیش کُتگ، جمے پیم بساک ءِ گوستگیں کماش ڈاکٹر صبیحہ بلوچ ءُ بساک ءِ ھستیں کماش شبیر بلوچ ءَ مراگاہ ءَ بلوچ راج راجمان ءُ بلوچ ورنایانی زمہ واری ءِ سر ءَ گُشتانک ھوار بیتگ اَنت۔
شنگ بیتگیں درشان ءَ گوشگ بیتگ کہ دیوان ءِ گُڈسر ءَ ساز ءُ زیملی بھر بیتگ کہ آئی ءِ تہ ءَ استاد وھاب بلوچ، خالق فرھاد ءُ گودی نوشین قمبرانی ءَ گوں وتی وشیں تواراں سوت الھان کُتگ انت۔
آئی ءَ گوشتگ ایشاں ھوار دوئیں روچاں بلوچستان کتاب کاروان ءِ کتاب میڑہ اڈ دیگ بیتگ ءُ جتا جتائیں سرھالانی سر ءَ کتاب ایر کنگ بوتگ انت ءُ ورنا ءُ نودربر، جنین ءُ مردیناں ھوار ھمک پڑ ءِ مردماں اتکگ ءُ کتاب میڑہ ءَ سیل کتگ ءُ پہ وت گچینی ئیں کتاب زُرتگ انت۔
درشان ءَ گوشگ بیتگ سئے سائنس اگزیبیشن اسٹال چہ رُژن سکول بلیدہ، بولان گرامر سکول تربت ءُ عطاء شاد ڈگری کالج تربت ءِ نیمگ ءَ لگوگ بیتگ انت کہ آھانی تہ ءَ نودربراں وتی جوڑ کتگیں سائنس پروجیکٹ پیش داشتگ اَنت ءُ مردماں آھانی کار ساڑاتگ ءُ آ دلبڈی داتگ اَنت۔ کلچرل اسٹال ءُ اکس کشی اسٹال ھم لگوک بیتگ اَنت کہ اود ءَ بلوچ ازمکار ءُ اکس کشاں وتی جوڑ کتگیں ازباب ءُ اکس پیش داشتگ اَنت۔
شنگ شنگ بیتگیں درشان ءَ گوشگ بیتگ اے دو روچی مراگاہ گوں سوبمندی ءَ آسر بوتگ، دیوان ءَ ساڑی ئیں سنگت بنجاھی کماش شبیر بلوچ، بنجاھی ھالرسانی کارگشاد اُزیر بلوچ، بنجاھی کمک کارگشاد مھمد بلوچ ءُ بنجاھی کمیٹی ءِ باسک بالاچ بلوچ بیتگ اَنت ءُ دیوان ءَ اتکگیں ھاسیں مھمان بساک ءِ گوستگیں کماش صبیحہ بلوچ، غفور شاد، عصاء ظفر، منظور بلوچ، نوشین قمبرانی، وھاب بلوچ، خالق فرھاد، عبداللہ بلوچ، حیات عبدالحق، بانک اسماء بلوچ، ایڈوکیٹ جاڑین دشتی، عطاشاد ڈگری کالج تربت ءِ استاد ءُ اسٹاپاں ھوار ایدگہ ادیب، نبشتہ کار ءُ سیاسی مردم ھوار بیتگ اَنت۔
دیوان ءَ تران کنان ءَ صبیحہ بلوچ ءَ گوْشت کہ ابید پرک ءُ پیر ءَ کیچ من ءَ سک دوست بیت ءُ ایشی ءَ چہ وشبھتی دگہ بگندے مہ بیت کہ کسے کیچ ءَ ودی بیتگ ءُ اے ڈولیں باسمائیں سیاسی ماھولے ءَ زِندگی کنگ ءَ اِنت۔ بلوچ ءَ گوں بندوکیں ھمک کسان کسانیں جیڑھاں کہ چارے اے دُرستانی بندیک روت ءُ ایردستی ءَ سر بیت پمیشکا سرجمیں جیڑھانی توجیل کنگ ءَ پہ مھکمیں جھد ءُ باسمائیں املے ءِ درکار اِنت ءُ اے ھاتر ءَ بلوچ ورنا زانشتکاری، پھکاری ءُ املی ئیں بہ بنت پرچاکہ جانبڈ ءُ بے جوھریں ورنا راج ءَ دیمروئی دات نہ کن انت پمیشکا اے ڈولیں مردمانی زِند بے مانا اَنت۔
آئی ءَ گوشتگ دیوان ءَ تران کنان ءَ بنجاھی کماش شبیر بلوچ ءَ گوشت کہ بلوچ ورنایاں اے مراگش ءِ وسیلہ ءَ گشگ لوٹ آں کہ آ وتی اندر ءَ راجی درد ءُ مارشت ودی بہ کن اَنت، بلے اے مارشت ءُ سما ادارُکی بنیات ءَ مہ بنت بگندے آ دائمی بہ بنت۔
آئی ءَ گوشتگ مرچی مئے چاگرد ءِ دو اکس مارا گندگ ءَ کئیت کہ یک نِگاھے ءَ ما چاریں کہ مارا چہ کمیٹڈ تریں مردم نیست بلے ایشی ءَ ابید اگاں ما بہ چاریں گڑا ھما کار کہ مارا کنگی اَنت آھانی دیم ءَ اے امل بگندے آرت ءِ تہ ءَ واد ءِ برابر ءَ اَنت۔مارا چہ اے کاراں سرجم ءَ دلجم بوگی نہ اِنت ءُ ناکہ مایوس بوگی اِنت بلکیں جُنزگی ءُ چہ ایشی ءَ گیش مھکم بوان بوگی اِنت دانکہ یک دورے بئیت کہ دنیا ءِ ایدگہ راج مئے کتگیں املاں بہ وان اَنت ءُ مارا چہ در بہ بر اَنت۔
شنگ بیتگیں درشان ءَ گوشگ بیتگ کہ دیوان ءَ جتاجتائیں سرھالانی سر ءَ المی ءُ زانشتی تران ءُ باوست بیتگ انت ءُ پیش کار ءُ ترانکاراں جتاجتائیں سرھالانی سر ءَ سائنسی ، پٹ ءُ پولی ءُ گیشنتگین داباں گوں وتی گپ ءُ ھبر پیش کتگ اَنت ءُ بلوچ راج ءِ ھستیں جیڑھانی سر ءَ درنگازی ءَ ھوار آھانی توجیلی ءَ پہ دلجمی ءَ گپ ءُ ترا ن بیتگ انت۔
درشان ءَ گوشگ بیتگ کہ بلوچ سیاست ءِ دلبند کیچ ءَ اباء لٹریری فیسٹیول ءِ اڈ دیگ ءُ بلوچ مھلوک ءِ اے کساس ءَ بھر زیرگ ءُ شرپ بکشائیگ بلوچ چاگرد ءَ راج دوستی، زانشت دوستی ءُ سیاسی سِنچ ءُ سما ءِ برورد اِنت۔ بلوچ اسٹوڈنٹس ایکشن کمیٹی بلوچ نودربرانی درسگاہ ءُ جھگیریے ءِ بستار ءَ ھمے جھد ءَ اِنت کہ بلوچستان ءَ زانشتی ءُ سیاسی مراگاہ اڈ بہ دنت ءُ بلوچ چاگرد ءِ تہ ءَ زانشتی باوست ءُ تران ءِ ماھولے ودی بہ کنت داں بلوچ ورنا ءُ مھلوک سیاسی ھوالہ ءَ باسما بہ بنت ءُ بلوچ راجی جیڑھاں گوں زانت ءُ زانشت ءَ توجیل کنگ ءِ جھد ءَ بہ کن اَنت۔ ادارہ ءِ جھد اِنت کہ وتی راجی زمہ واری ءَ پیلو کنان ءَ دیمتر ءَ جم اے ڈولیں مراگاہ شرتر ءَ چہ شرتریں رنگے ءَ اڈ بہ دنت اِنت۔
درشان ءَ گوشگ بیتگ مراگاہ ءِ سوبمندی ءَ عطاشاد ڈگری کالج تربت، ایدگہ دُرستیں وانگجاہ ءُ کیچ ءِ کُلیں مھلوک ءِ منتواریں کہ آیاں اے مراگش ءِ سوبین کنگ ءَ وتی کرد پیلو کُتگ ءُ مراگش سوبمند کتگ –