بیگواھیں نودربر بیان بلوچ ءِ یل کنائینگ ھاتر ءَ نندانک برجاہ، پت ءَ بھر زرتگ

اوتھل یونیورسٹی ءِ نودربرانی زورانسری آوار جنی ءِ ھلاپ ءَ زھرشانی نندانک برجاہ ءَ اِنت کہ یونیورسٹی ءِ بُنجاھی دروازگ دیم ءَ گوستگیں روچ ءَ چہ برجاہ ءَ اِنت-

نندانک ءِ بندات گوستگیں روچ ءَ نودربرانی نیمگ ءَ چہ روانک کشگ ءَ پد کنگ بیتگ، چریشی ءَ جنک ءُ بچکیں نودربر ءُ دگراں بھرزرتگ-

نودربرانی رِد ءَ اے نندانک ببان بلوچ ءِ یل کنائینگ ھاتر ءَ برجاہ بیتگ، کہ آ چیزے روچ ءَ ساری چہ اوتھل بازار ءَ دگہ سے نودربرانی ھمراھی ءَ پاکستانی پوج ءِ دست ءَ آوار جنگ بیتگ اَت – گلاب، بالاچ ءُ ناصر یل کنگ بیتگ اَنت بلے ببان بلوچ انگت بیگواہ ءَ اِنت-

نندانک ءَ ببان بلوچ ءِ پت ءَ ھم بھر زرتگ ءُ آئی ءَ وتی چک ءِ زوت یل کنائینگ لوٹ کتگ، زھرشانی کنوکاں گْوشتگ کہ ” زانت ھم بے مُھر جوڑ کنگ بیتگ، ءُ نودربراں نشانگ کنگ ءَ اَنت کہ اے کبول نہ اِنت-

نودربراں واکدار ءَ چہ لوٹ کتگ کہ ببان بلوچ ءِ زوت دیم ءَ آرگ بہ بیت ءُ زورانسری آوار جنی درچ ءَ بند کنگ بہ بیت، آئی ءَ گوشتگ کہ ما وتی سنگت ءِ یل کنائینگ ءَ تاں بے توار نہ بہ ئے ایں ءُ اگاں لوٹ سرجم کنگ نہ بیت اَنت گُڑا زھرشانی ءُ تُرند کن ایں-

زھرشانی ئیں نندانک ءَ نشتگیں مردماں بیگواھیں نودربرانی اکس پلے کارڈز چست کتگ بیتگ اَنت آیانی سر ءَ یل کنائینگ لوٹ نکش بیتگ اَنت – زھرشانی کنوکاں گوشتگ آ ببان بلوچ ءِ یل کنائینگ ءَ تاں زھرشانی ءَ برجاہ دار اَنت-