نوشکی: پاکستانی پوج ءِ سر ءَ اُرش، بیرانیانی ھال

بلوچستان ءِ دمگ نوشکی ءَ سلاہ بندیں مردماں پاکستانی پوج ءِ سر ءَ اُرش کتگ-

گیشیں اھوالانی رد ءَ نوشکی اڈے ءِ ھند ءَ ایپ سی ءِ بنجل ءِ دیم ءَ ایپ سی ءِ کارندہ ناشناسیں مردماں نشانگ کتگ اَنت-

اھوالانی رد ءَ ایپ سی ءِ بنجل ءِ دیم ءَ اوشتوکیں سَے کارندہ اوشتوک بیتگ اَنت کہ سلاہ بندیں مردماں نشانگ کتگ اَنت کہ ھرسئیں کارندہ مرتگ ءُ زدگ بیتگ اَنت-

اُرش ءِ درگت ءَ انگت ءَ واکدارانی بنگپ دیم ءَ نیتکگ اَنت-

زانگ بہ بیت اے دمگ ءَ بلوچ آجوئی لوٹوکیں سلاہ بندیں گل جاڑیگ اَنت – 29 نومبر ءَ نوشکی ءَ بلوچ سرمچاراں زرین جنگک ءِ ھند ءَ ناکہ بندی کتگ ءُ ھمے وھد ءَ لیویز ءِ چوکی اش دستیگ کتگ-

اُرش ءِ زمہ واری بلوچ لبریشن آرمی ءَ زرتگ ات ءُ گوشتگ ات کہ سرمچاراں زرین جنگل ءِ ھند ءَ شھدگ بستگ ءُ پاکستانی پورس لیویز ءِ یک چوکی ءِ دستیگ کتگ ءُ سلاہ ءُ کارندہ گپتگ انت ءُ پد ءَ لیویز کارندہ بلوچ بوگ ءِ پژدر ءَ یل داتگ اَنت-

آئی ءَ گوشتگ ھمے وھد ءَ سرمچارانی جتا جتائیں ٹولیاں شھدگ داں یک ادارے ءَ بستگ ءُ گاڑی پٹ ءُ پول کتگ انت ءُ سیمی ٹولی ءَ یک لٹ ءُ پلی کمپنی ءِ مانداشتگ ءُ آئی ءِ پنچ کارندہ دزگیر کتگ ءُ گون وت برتگ اَنت کہ آیانی پٹ ءُ پول برجاہ اِنت-

مروچی بیتگیں اُرش ءِ زمہ واری تنی وھدی کس ءَ پہ وت نہ زرتگ-