نودربر چہ گوستگیں روچ ءَ یونیورسٹی ءِ تہ ءَ پوج ءِ ھست بوھگ ءِ ھلاپ ءَ زھرشانی کنگ ءَ اَنت ۔
بلوچستان ءِ بنجاھی شھر شال ءَ بولان میڈیکل کالج ءِ بند کنگ ءُ پولیس ءُ پورسز ءِ کارندھانی نیمگ ءَ ھاسٹلانی سر ءَ دستیگ کنگ ءِ ھلاپ ءَ نودربرانی زھرشانی بنجل دومی روچ ءَ برجاہ اِنت، ترندیں سارتی ءَ ابید ھم بازیں کچے ءَ نودربر زھرشانی بنجل ءَ ھوار اَنت-
بلوچستان ءِ نودربر گلانی نیمگ ءَ ھاسٹلانی سر ءَ زورگری ءُ لشکری کارمندانی وانگی ادارھانی توک ءَ جاڑیگی ءِ ھلاپ ءَ گوستگیں روچ ءَ چہ جامعہ ءِ بنجاھی دروازگ ءِ دپ ءَ زھرشانی داتگ ءُ نشتگ انت-
نودربراں کیمپ ءِ تہ ءَ وتی سئے مستریں لوٹ سرکار ءِ دیما پیش کتگ انت۔1 درستیں دزگیریں نودربر زوت یل کنگ بہ بنت۔ 2 بولان میڈیکل کالج ءُ ھاسٹل پد ءَ پچ کنگ بہ بنت۔ 3اے وئیل ءَ ھواریں پولیس ءُ کالج ءِ کارمستر ءِ ھلاپ ءَ سکیں کارروائی کنگ بہ بیت۔
زھرشانی کنوکیں نودربرانی گْوشگ اںنت کہ کالج ءُ ھاسٹلانی وانگ ءُ زانگ ءِ ھک ءِ زمانت اَنت کہ زوراکی ءِ زور ءَ پچگرگ بوگ ءَ انت – ھاسٹل ءُ کالجاں بند کنگ نا ایوک ءَ ما وانگ ءُ زانگ ءَ چہ دور کنگ بوگ ءَ اِنت بلکیں مئے آیوکیں پدریچ تھاریں شپے آرگ ءَ اَنت-
پولیس ءِ انوگیں کارروائی ءِ سر ءَ ایراد گرگ ءَ نودربراں گشتگ کہ مئے یکیں جرم ایش انت کہ ما وانگ لوٹ ایں ۔ سرکار ءُ انتزامیہ وانگ ءُ زانگ ءِ چاگرد ءَ ھراب کنان ءَ بلوچ ورنایانی راہ بند کنگ ءِ کوشست ءَ کنگ ءَ اَنت۔
زھرشانی بنجل ءَ بھر زوروکیں نودربراں سکیں سردی ءَ ابید ھم وتی زھرشانی برجاہ داشتگ۔ زھرشانی کنوکاں سرکار ءَ را گوشتگ کہ اگاں آیانی لوٹ پیلو کنگ نہ بوت اَنت گڑا زھرشانی ءِ پتر گیش کنگ بیت ءُ سرجمیں اُستان ءَ زھرشانی کنگ بیت انت۔
یات بہ بیت کہ پولیس ءَ بی ایم سی ءِ ھاسٹل ءِ سر ءَ چھاپہ جتگ ءُ بازیں نودربر دزگیر کتگ انت، ھمے وھد ءَ بازیں نودربر ٹپیگ یا بے ھوش بوتگ اَنت۔
نودربر گلاں اے وئیل ءِ ھلاپ ءَ زھرشانی بندات کتگ ءُ سرکار ءُ انتزامجہ ءِ سر ءَ ایراد گپتگ۔ نودربرانی گوشگ اِنت کہ اے کار یک زانوکیں پندلے کہ بلوچ ورنایاں چہ وانگ ءِ پڑ ءَ درکنگ بہ بنت۔
نودربر رھشوناں پولیس ءِ کارروائی ءَ را بلوچ ءُ پشتون نودربرانی میان ءَ تپاوت پیداک کنگ ءِ پندل لیک اِتگ ءُ گْوشتگ اے کارروائی وانگ ءُ زانگ ءِ ادارگاں پہ جنگی کاراں کارمرد کنگ ءِ کوشست اِنت۔ ما اے پندل ءَ بےسوب کنان ءَ وانگ ءُ زانگ ءِ ادارھانی تہ ءَ امن ءُ ایمنی ءَ داریں۔