ھک دے تھریک ءَ بشیر احمد ءِ درکانودی کوش ءِ ھلاپ ءَ باندا گوادر ءِ سرجمیں دمگاں تھتگ بندیں ھڑتال ءِ جار جتگ-
کُشگ بیتگیں بشیر احمد ءِ درکانودی کوش ءِ ھلاپ ءَ ھک دے تھریک بلوچستان نیمگ ءَ چہ باندا بیست ھپت نومبر ءَ سرجمیں گوادر ءَ تھتگ بندیں ھڑتال جار جنگ بیتگ-
ھک دے تھریک بلوچستان ءِ بُنجاھی آرگنائزر حفیظ کیازئی ءَ مروچی شال پریس کانفرنس کنان ءَ گْوشتگ کہ سی ٹی ڈی ءِ دست ءَ بندیگ کُشگ بیتگیں بشیر احمد ءِ درکانودی کوش ءَ تُرندی ءَ ایر جتگ باندا سرجمیں گوادر ءَ تھتگ بندیں ھڑتال ءِ جار جتگ-
ھک دے تھریک ءِ جارکش گْوشتگ کہ اے دردناکیں ءُ درانسانی وئیل ھلاپ ءَ انجمن تاجر ءُ باپاری مردماں چہ کمک ءِ دزبندی کن ایں
زانگ نہ بیت گوستگیں روچاں پاکستانی پوج ءِ ھمگرنچیں ادارہ آئی ایس پی آر ءَ بیست دو نومبر ءَ آواران، کیچ ءُ ڈیرہ بگٹی ءِ جتاجتائیں دمگاں آپریشنز ءُ میڑانی میان ءَ چار مردم ءِ جنگ ءِ ٹاہ داتگ-
بیست دو نومبر دوھزار بیست چار ءَ بشیر احمد ء عبدالغنی ءِ لاش بلوچستان ءِ دمگ کیچ ءَ دزکپتگ- بشیر احمد مئی دوھزار بیست چار ءَ چہ گوادر ءَ پاکستانی پوج ءَ زورانسری آوار جتگ ءُ بیگواہ کتگ اَت، اود ءَ پد ءَ سی ٹی ڈی ءُ ھمے وھد ءَ صوبائی تھکاری وزیر ضیاء لانگو ءَ شال ءَ پریس کانفرنس ءِ میان ءَ آئی ءِ دزگیری پدر کتگ آئی ءِ سر ءَ بلوچ لبریشن آرمی ( بی ایل اے) ءَ چہ سیادی دارگ بھتام جتگ وھدے کہ گوستگیں روچاں آ یک دروگیں میڑے ءِ نام داتگ اَت-