آواران : دلجان بلوچ ءِ زورانسری آوار جنی ءِ ھلاپ ءَ نندانک، سمی دین بلوچ ھوار

زورانسری بیگواھیں دلجان بلوچ ءِ یل کنائینگ ھاتر ءَ آواران ڈی سی کمپلکس ءِ دیم ءَ نندانک ءَ ھشتمی روچ ءَ ھم برجاہ ءَ اِنت-

کھول گوشگ اِنت کہ دلجان بلوچ ءِ یل کنائینگ ءَ تاں ڈی سی کمپلکس کجام ھما ءَ پُرکاری ءِ ھاتر ءَ سرجمی ءَ بند بیت-

وھدے کہ بلوچ یکجھتی کمیٹی ءِ راھشون سمی دین بلوچ اَتکگ ءُ کھول گوم ءَ یکجاھی درشان کتگ ءُ آیانی گوم ءَ نندانک ءَ نشتگ-

زانگ بہ بیت کہ جون دوازدہ دوھزار بیست چار ءَ چہ آواران ءَ سیادی داروکیں دلجان بلوچ پاکستانی پوج ءَ آوار جتگ ءُ زورانسری بیگواہ کتگ کہ انگت آئی ءِ درگت ءَ ھچ وڑیں ھال نیست اِنت آ کجا اِنت کجام جاورانی تہ ءَ اِنت-

سمی دین بلوچ ءَ گوشتگ کہ دلجان ءِ یل کنائینگ ھاتر ءَ آئی ءِ کھول بازیں رند ءَ زھرشانی کتگ ءُ نو آ یکرندے پد ءَ ڈی سی کارگس دیم ءَ نندانک داتگ اِت- انتزامیہ ءُ سیکیورٹی کارمند آیاں زھرشانی ھلاس کنگ ءِ بیھار ءَ دیگ ءَ اَنت ءُ ترسینگ اَنت ھم، وھدے کہ نندانک ءِ ھاتر ءَ جتگیں تمبو ھم انتزامیہ ءَ پروشتگ ءُ برتگ- کھول زیکتّانیں آزمان چیر ءَ نندانک دیگ ءَ اَنت-

آئی ءَ گوشتگ کہ اگاں اے رسانکدر بلوچستان وزیراں چہ زورانسری آوار جنی ءِ درگت ءَ جست کنگ ءِ جاہ ءَ ھما اسرمندیں کھولاں چہ جست بہ کن اَنت گُڑا آیاں راستی ءِ زانت بیت- بلے آواران وڑیں پدمنتگیں دمگ مردم پاکستانی رسانکدر ءِ واستا ھچبر دلگوش جوڑ نہ بنت-