تربت ءَ دروگیں میڑ ءَ کشگ بیتگیں بالاچ مولا بخش ءِ سالروچ ءِ درگت ءَ مُچی

بلوچ یکجھتی کمیٹی ءِ چیردستی ءَ شھید بالاچ مولابخش ءِ سالروچ درگت ءَ سیمینارے برجم دارگ بوتگ۔

شھید بالاچ مولابخش ءِ اولی سالروچ ءِ درگت ءَ کیچ ءَ بلوچ یکجھتی کمیٹی ءِ نیمگ ءَ برجم دارگ بیتگ ، سیمینار شھید فدا چوک تربت ءَ برجم دارگ بیتگ۔ سیمینار ءَ شال ءَ ھوار بلوچستان ءِ دگہ دمگاں چہ بلوچ یکجھتی کمیٹی ءِ رھشون، وکیل، سیاسی رھشون ءُ باسکاں بازیں کچے ءَ بھر زرتگ-

سیمینار ءَ تران کنان ءَ یکجھتی کمیٹی ءِ بنجاھی سروک ڈاکٹر ماہ رنگ بلوچ ءَ گشت کہ ریاست بلوچ راج ءِ مڈیانی لٹ ءُ پُل کنگ ءُ نسل کشی ءِ پالیسیاں کنگ اِنت، آئی ءَ گشتگ کہ گوستگیں دو دھکاں بلوچستان ءَ ھمک روچ لاش دور دیگ بوگ ءَ اَنت-

ڈاکٹر ماہ رنگ ءَ گوشت کہ شھید بالاچ ءِ لاش ءَ را بے وارس سرپد بوگ ءُ دور دیگ بوتگ بلے ھاموشی ءِ بدل ءَ آئی ءِ کھول ءَ زھرشانی ءِ راہ گپتگ 23 نومبر ءَ بگر داں 6 دسمبر 2023 ءَ زھرشانی نندانک دیگ بیتگ۔ چریشی ءَ پد ما تربت ءَ داں اسلام آباد ءَ لانگ مارچ کتگ-

آئی ءَ گیش گوشتگ کہ ریاستی زلماں ابید بلوچ راج ءَ وتی جھد برجاہ دارگی انت گوستگیں یک سالے ءِ تہ ءَ 200 ءَ چہ گیش ورناہ بیگواہ کنگ بوتگ اَنت، وھدے کہ ھر بلوچ لوگی زوراکی ءِ آماچ انت-

سیمینار ءِ تہ ءَ مکران ہائی کورٹ ءِ بار ءِ سروک مھراب خان گچکی ایڈووکیٹ ءَ گوشت کہ مردمانی زورانسری بیگواہ کنگ مزنیں جرمے، ایشی ءِ تہ ءَ نہ ایوک ءَ سول بلکینگ ءَ میان اوستمانی کانود ءِ ھم لگتمالی اِنت۔

آئی ءَ گوشت کہ گوستگیں وھد ءَ بنگال ءَ اے درچ ءِ آسر بلاھیں آسر بوتگ انت بلے انگت ءَ بلوچستان ءَ ھمے آزمائش بوھگ ءَ انت۔

کیچ بار ءِ سروک عبدالمجید شاہ ایڈووکیٹ ءَ انوگیں ڈائریکٹوریٹ آف آپریشن ءِ سر ءَ ایراد گرگ ءِ وھد ءَ گوشت کہ 70 سال ءَ کنگ بوتگیں آپریشنانی تہ ءَ ھچ آپریشن ءَ گھتری نہ بوتگ بلکیں جاور ھال ھراب بوتگ اَنت۔

بلوچ یکجھتی کمیٹی ءِ رھشون سبغت اللہ شاجی ءَ گْوشتگ کہ شھید بالاچ ءِ شھادت ءَ مئے جد ءُ جھد ءَ را نوکیں راھے داتگ۔ آئی ءَ چہ راج ءَ دزبندی کتگ مھلوک یکجاہ بہ بیت ءُ ریاستی پندلاں بے سوب بہ کنت اِنت-

ھمے وھد عبدالمجید دشتی ایڈوکیٹ ءَ گُشتگ کہ بلوچ یکجھتی کمیٹی ایوک ءَ یک کارندہ یے نہ اِنت بلکیں میان اُستمانی تک ءَ ھم پہ بلوچ جیڑہاں دیم ءَ برگ ءَ اِنت۔ آئی ءَ لیکہ داتگ یک ٹیمے جوڑ کنگ بہ بیت کہ بلوچ مھلوک ءِ کیس ءَ دنیا ءَ انساپ ءِ گھگیری ءَ بہ کنت اِنت۔

سیمینار ءَ شہید بالاچ ءِ برات یونس بلوچ ءُ مجیب رحیم ءِ براتاں شھیداں لچہ ءِ دروشم ءَ داد داشت۔ بلوچ مھلوک اھد کتگ کہ بلوچ راج ءِ ھک ءُ انساپ ءِ ھاتر ءَ جد ءُ جھد برجاہ مان ایت-

گڈسرا جارچیناں گشت کہ اے سیمینار یک انچیں جلوہ یے بوتگ کہ شھید بالاچ مولابکش ءِ کربانی ءَ بلوچ راج ءِ دل ءَ یک جنزے ءِ برانز داتگ، کہ زلم ءُ زوراکیانی ھلاپ ءَ یک مھکم ءُ تپاکیں جنبشے ءِ سوب جوڑ بوگ ءَ اِنت۔

–