آواران : دلجان بلوچ ءِ کھول نندانک برجاہ

آواران انتزامیہ جیڑھانی گِشگیواری جاہ ءَ تُرسینگ ءَ اِنت – کھول ءِ شکایت

چہ آواران ءَ پاکستانی پوج ءِ دست ءَ زورانسری آوار جنی ءِ نشانگ کنگ بیتگیں دلجان بلوچ ءِ یل کنائینگ ھاتر ءَ برجاہ ءَ اِنت زھرشانی نندانک ءَ مروچی ھپتمی روچ اِنت، اے نندانک ھژدہ نومبر ءَ بندات بیگ ءُ یکشل ءَ برجاہ ءَ اِنت-

زھرشانی کنوک ءُ انتزامیہ میان ءَ گپ دیوان باز رند ءَ بے سوب بیتگ، ءُ زھرشانی کنوکاں نندانک برجم دارگ جار جتگ-

زھرشانی کنوکانی گوشگ اِنت کہ نندانک سبب ءَ آواران ءَ سرجمی ءَ کرفیو جتگ، ءُ آیاں آپ ءُ توژگ پُجّارینگ ءَ زبھر کنگ ءَ اَنت – ترس اِنت انتزامیہ یکو بیٹ ورک بند کتگ زھرشانی ءَ بے سوب کنگ جُھد ءَ انت-

گوستگیں شپ ءَ پوج ءَ نندانک سرجمی ءَ انگر ءَ کتگ ءُ زھرشانی کنوک بیھار داتگ اگاں نندانک ھلاس نہ کتگ گُڑا لُٹ کُٹ کنگ بیت- زھرشانی کنوکانی اے ھم گوشگ اِنت کہ اشانی پجّار کارڈ ءُ موباھل پون بچگرگ جھد کتگ، وھدے کہ ھچ وڑیں پھاز دیگ ءَ نہ اِنت-

زانگ بہ بیت کہ آواران تھی ءُ دری راہ گوستگیں شش روچاں چہ جتاجتائیں ھندانی سر ءَ بند اَنت- نندانک ءَ نشتگیں زھرشانی کنوکانی گوشگ اِنت کہ اے زھرشانی دلجان ءِ یل کنائینگ ءَ تاں برجاہ بیت ءُ راہ بند بنت-

زھرشانی ءَ زالبول، زھگ ءُ کماش ھم ھوار اَنت – زھرشانی کنوکاں تچک کتگ توری آنسو گیس کارمرز کنگ بہ بیت، لَٹ کُٹ کنگ بہ بیت یا بمبگواری، اے زھرشانی دلجان بلوچ یل کنائینگ ءَ تاں ھلاس نہ بیت-

زھرشانی کنوکاں وکیل، نودربریں گلاں، ءُ انسانی ھکانی گلاں چہ دزبندی کتگ کہ آ دلجان بلوچ ھک ءَ توار چست بہ کن اَنت ءُ زھرشانی کنوکانی پھاز ھاتر گامگیج بزور اَنت- آیانی گوشگ اِنت کہ آیانی یکیں لوٹ اِنت بے میار ءِ یل کنائینگ اِنت-