نوشکی ، شال: پوج ءُ پولیس ءِ سر ءَ اُرش

نوشکی ءِ کوھی دْرچ ءَ لشکر کشی ءَ دلگوشیں پاکستان پوج ءِ کارمندانی سر ءَ سلاہ بندیں مردماں اُرش کتگ-

بلوچستان ءِ دمگ نوشکی ءَ لشکر کشی ءَ دلگوشیں پاکستانی پوج ءِ کارمندانی سر ءَ سلاہ بندیں مردماں اُرش کتگ-

پاکستانی پوج ءَ سے روچ ءَ گیش انت کہ نوشکی، لجے ءُ شورپارود ءَ لشکر کشی ءَ دلگوش بیتگ کہ گوستگیں روچ ءَ ھلاس بیتگ-

ھالانی رِد ءَ پشمبے ءِ شپ ءَ سلاہ بندیں مردماں گوربرات ھند ءَ تمبو جتگیں پاکستانی پوج ءِ کارمند نشانگ کتگ اَنت-

دمگی مردماں ٹی بی پی ءَ گوں گوشتگ کہ تیرگواری رد داں دیراں برجاہ بیتگ وھدے کہ اے میان ءَ بازیں تراکانی توار ھم اش کنگ بیتگ انت-

زانگ بہ بیت لشکر کشی ءِ میان ءَ پوج ءِ کارمنداں دمگی مردمانی لوگانی ماندارگ ءَ ھوار آبادیانی سر ءَ مارٹر آس دیگ ءِ ھال سر بیتگ انت-

واکدار ءَ سے روچ ءَ تاں برجاھیں لشکر کشی ءِ درگت ءَ ھچ وڑیں درشان شنگ نہ کتگ-

ھمے وڑ ءَ بلوچستان ءِ بنجاھی شھر شال ءَ پولیس موبائل بمب اُرشے ءِ نشانگ کنگ بیتگ-

اھوالانی رد ءَ شال ءَ روکپتی شھدگ ءَ پولیس ءِ موبائل ءِ نزیک بمب تراکے بیتگ کہ چریشی ءِ آسر ءَ یک کارندھے زدگ بیتگ-