آواران: بیگواھیں دلجان بلوچ ءِ یل کنائینگ ھاتر ءَ نندانک چارمی روچ ءَ ھم برجاہ

زورانسری بیگواہ دلجان بلوچ ءِ یل کنائینگ ھاتر ءَ آواران ءَ ڈی سی کارگس دیم ءَ زھرشانی ئیں نندانک ءَ چارمی روچ ءَ ھم برجاہ، زھرشانی کنوکاں آواران ءَ تاں بیلہ دگ ءِ جتاجتائیں ھندانی سر ءَ سرجمی روگ ءُ آیگ ھاتر ءَ بند کتگ-

ھمے درگت ءَ دلجان بلوچ ءَ کھول ءَ گوشتگ کہ اشانی لوٹانی سر ءَ ھچ وڑیں گامگیج زیرگ بیگ ءَ نہ اِنت ءُ واکدار نیمگ ءَ چہ گپ دیوان ھاتر ءَ شریں گامگیج گندگ بیگ ءَ نہ اِنت-

زھرشانی کنوکاں گوشتگ کہ دلجان بلوچ ءِ یل کنائینگ ءَ تاں نندانک ھلاس نہ بیت-

بلے زھرشانی کنوکانی رِد ءَ زی یک گپ دیوان ٹولی ءَ سر بیتگ کہ آئی ءِ گوم ءَ گپ رپ برجاہ ءَ اِنت – گپ دیوانی ٹولی ءَ میونسپل کمیٹی آواران ءِ چیئرمین عابد حسین، وائس چیئرمین حبیب اللہ محمد حسنی، میر ھاشم، میر محمد یعقوب، نیشنل پارٹی ءِ تھسیل آواران ءِ صدر شمیم نصرت، قادر بخش، ءُ بی ایس او پجّار ءِ بُنجاھی کمیٹی ءِ باسک شفیق مھر ھوار بیتگ اَنت-

زھرشانی کنوکاں گپ دیوان ءِ کار ءِ تہ دیم روگ اُمیت پدر کتگ بلے وتی درشان ءِ سر ءَ اوشتگ ءُ گْوشتگ کہ وھدے کہ دلجان بلوچ یل کنگ نہ بیت، زھرشانی ءِ نندانک برجاہ ءَ اِنت-

کھول ءُ زھرشانی کنوکاں گوشتگ کہ اشانی گوم ءَ بیتگیں زوراکیانی ھلاس کنگ ءُ زورانسری آوار جنی بیتگیں مردمانی یل کنائینگ آیانی بُنکی ھک اِنت- آیاں راج ءَ چہ دزبندی کتگ کہ آ اشانی زھرشانی ءَ ھوار بہ بنت یکجاھی درشان بہ کن اَنت-