بلوچ لبریشن آرمی ءِ جارکش جیئند بلوچ ءَ رسانکدراں شنگ کتگیں یک درشانے ءَ گوشتگ کہ سرمچاراں 16 نومبر ءَ کلات ءِ ھند جوھان ءَ زورگریں پاکستانی پوج ءِ یک بنجاھی بنجلے ءِ سر ءَ اُرش کتگ ءُ دشمنیں پوج ءِ کم چہ کم 29 کارندہ کشتگ ءُ بنجل دستیگ کتگ ءُ سلاہ ءُ گولہ بارود دستیگ کتگ اَنت-
آئی ءَ گوشتگ بی ایل اے ءِ گچینی ٹولی ‘ فتح اسکواڈ’ ءِ سرمچاراں کلات ءِ شھر ءَ 60 کلومیٹر ءِ دوری ءَ جوھان ءِ ھند ءَ شاہ مردان ءَ 15 ءُ 16 نومبر ءِ میانی شپ ءَ زورگریں پاکستانی پوج ءِ 61 ونگ ءِ بنجل ءِ یک مزنیں بھرے اُرش ءِ نشانگ کتگ-
جارکش ءَ گوشتگ بی ایل اے ءِ یونٹ فتح اسکواڈ ءَ شپ ءِ ساھت نُھ ءِ نزیک ءَ سَے نیمگاں دشمن ءِ بنجاھی بنجک ءُ آؤٹ پوسٹانی سر ءَ اُرش ءِ بندات کتگ – شپ ءِ ساھت یک ءَ برجاہ بیوکیں اے دراج کشیں جنگ ءَ فتح اسکواڈ ءَ زورگریں پوج ءِ سَے آوٹ پوسٹ دستیگ کنگ ءَ سوبمند بیتگ ءُ بنجاھی بنجل ءَ رھوتی سِستگ ءُ آئی ءِ سر ءَ ترندیں اُرش کتگ-
آئی ءَ گوشتگ اُرش ءَ دسمنیں پوج ءِ کم چہ کم 29 کارندہ کشتگ اَنت ءُ بازیں پوجیاں وتی سلاہ دور داتگ ءُ شپ ءِ تھاری ءِ نپ چِست کنان ءَ وتی بنکی رواج بزدلی ءَ تتکگ اَنت ءُ سَے آوٹ پوسٹ ھالیگ ءَ یل اش داتگ انت – ھمے وھد ءَ پوج ءِ دَہ کارندہ زدگ بیتگ اَنت- بلوچ سرمچاراں بازیں کچے ءَ دشمنیں پوج ءِ سلاہ ءُ گولہ بارود دستیگ کتگ ءُ بی ایل اے ءِ بنجل ءَ برتگ اَنت-
دشمنیں پوج ءِ گون ءَ دیم پہ دیمی جنگ ءَ بلوچ لبریشن آرمی ءِ فتح اسکواڈ ءِ یک سرمچارے شاہ زیب ساتکزئی پنام ءِ گُرک بازیں کلاکاں دشمن ءِ پوج ءِ گون ءَ دیم پہ دیم ءَ جنگ ءُ شھید بیتگ-
جارکش ءَ گوشتگ شھید سنگت شاہ زیب ساتکزئی پنام ءِ گرک ء امان اللہ ساتکزئی شال ءِ دمگ لیس ڈگاری ءَ سیادی ئِے داشتگ – آئی ءَ سال 2018 ءَ بلوچ راجی آجوئی ءِ زرمبشت ءَ بھرے زرتگ- کوھی تک ءَ پیش آئی ءَ شال ءَ شھری گوریلا ءِ دروشم ءَ راجی پرز ءَ پیلو کنگ ءَ بیتگ-
گیش گوشتگ شاہ زیب ساتکزئی پنام ءِ گُرک ءَ کلات ءِ میدان ءَ بازیں وھداں دشمنیں پوج پروشی ءِ آماچ کنگ ءَ جوانیں کرد پیلو کتگ اَنت – آئی ءَ گچینی، پلگاردار ءُ چاگرد داریں ھمراھے بیتگے- تو ابرمی داد شاھیں جنگی دروشمانی واھند بیتگ ئے – گچینی رنگ ءَ ایمبیوش ٹیکٹکس ءَ گچینی ءِ دروشم ءَ زانشتدار بیتگ ئے – بلوچ لبریشن آرمی شھیدی ءِ داد شان ءَ سنگت شاہ زبیب ساتکزئی ءَ داد دنتے-
جارکش ءَ گوشتگ بلوچ لبریشن آرمی ءِ فتح اسکواڈ اے اُرش ءِ اے اُرش ءِ سوبمند بوگ ءَ پد واتر ھیڈکوارٹرز ءَ سلامتی ءَ سر بیتگ-
گڈسر ءَ گوشتگ ئے بلوچ لبریشن آرمی دشمنیں پوج ءِ سر ءَ ترندیں اُرشانی برجاہ دارگ ءَ ایشانی توک ءَ گیش ترندی کار ایت-