ڈیرہ غازی خان ءَ ھوار چہ بلوچستان ءَ شش مردم بیگواہ، یکے یل کنگ بیتگ

بلوچستان ءَ زورانسری آوار جنی ءِ دْرچ یکشل ءَ برجاہ ءَ اِنت، ھالانی رِد ءَ پاکستانی پوج ءَ جتاجتائیں بیڑانی وھد ءَ دگہ شش مردم آوار جنگ ءَ پد بیگواہ کتگ اَنت، چریشی ءَ پد ھمے ماہ ءَ زورانسری بیگواہ کنگ بیتگیں مردمانی کچ سی سے ءَ سر بیتگ اَنت-

گیشیں ھالانی رِد ءَ مشکے ءِ دمگ چہ نوکجو ءَ یازدہ نومبر ءَ پاکستانی پوج ءَ سمیر ء فقیر ءُ مسلم ء جمعہ آوار جتگ ءُ بیگواہ کتگ اَنت – دوئیں مردمانی درگت ءَ کھول ءَ ھچ وڑیں سرپدی دیگ نہ بیتگ-

ھمے وڑ کیچ ءَ سر بیتگیں ھالانی رِد ءَ پاکستانی پوج ءَ چہ کیچ بلیدہ ءَ دو ورنا وھاب ء سخی داد ءُ سمیر ء سخی داد شکار میان ءَ آوار جتگ ءُ بیگواہ کتگ اَنت-

کھول ءَ گوشتگ کہ ورنا نزیکیں دمگ میتاپ ءَ شکار ھاتر ءَ شتگ اَنت کہ اود ءَ پوج آ دزگیر کتگ ءُ بُنجل ءَ برتگ اَنت چریشی ءَ پد یل کنگ نہ بوتگ اَنت-

بلوچستان ءِ ھمراھی ءَ پنجاب ءِ تہ بلوچ دمگ چہ ڈیرہ غازی خان ءَ ھم زورانسری آوار جنی ءِ ھال اِنت، وسیلگ رِد ءَ پاکستانی پوج ءَ اعظم جان مری ءُ نبی لال ء قصر مری آوار جنگ ءَ پد بیگواہ کتگ اَنت-

وسیلگ رِد ءَ نبی لال ءِ پت قیصر مری دوھزار دوازدہ ءَ پوج ءَ کشتگ اَت، ءُ نو آئی ءِ چک ھم بیگواہ کتگ-

ھمے وڑ کیچ ءِ دمگ چہ دشت ءَ گوستگیں روچ ءَ پاکستانی پوج نیمگ ءَ چہ آوار جنگ بیتگیں ڈاکٹر لیاقت پوج ءَ یل کتگ-

زانگ بہ بیت کہ بلوچستان ءَ زورانسری آوار جنی ءِ وئیل نومبر ماہ ءَ ھم گیشی گندگ اتکگ – جتاجتائیں دمگاں چہ تنی وھدے سی سے مردم ءِ زورانسری آوار جنی ءِ رپورٹ نکش کنگ بیتگ-

بلوچستان ءَ زورانسری آوار جنی ءِ ھالاں یکجاہ کنوکیں گل بلوچ یکجھتی کمیٹی ءُ وائس فار بلوچ مسنگ پرسنز ءِ رِد ءَ اشی ءَ ساری گوستگیں ماہ اکتوبر ءَ یکسد بیست ھپت مردم زورانسری آوار جنی وئیل نکش کنگ بیتگ اَنت، آیانی تہ ءَ لھتے آجو بیتگ بلے بازی ئِے انگت بیگواہ اِنت-

بلوچ یکجھتی کمیٹی ءَ وتی درشان ءَ گْوشتگ کہ انسانی ھکانی میانی استمانی ادارہ اے مزنیں جرم ءِ ھلاپ ءَ زوت گامگیج بزور اَنت- گل گوشگ اِنت کہ بلوچستان ءَ انسانی ھکانی ھلاپ ورزی بیگ ءَ اِنت، ءُ بلوچ راج ریاستی زوراکی ءُ چکچینی ءِ دیمپان اِنت- گل ءَ دیمتر ءَ گوشتگ کہ بلوچستان ءَ چُشیں کھول یا لوگ نیست اِنت اے ریاستی زوراکی ءَ اسرمند نہ اِنت-