دو روچانی میان ءَ سرجمیں بلوچستان ءَ فرنٹیئر کور، لیویز فورس، کوسٹ گارڈ ءُ مڈی بروک ءُ گیس ءِ پائپ لائن بروکیں گاڑیاں ھوار پاکستانی لشکر نشانگ جوڑ کنگ بوتگ انت۔
گوستگیں شپ ءَ مزنیں کساسے ءَ سلاہ بندیں مردماں اورماڑہ ءُ پسنی ءِ میان ءَ سئے جتا جتائیں جاھاں کوسٹل ھائی ءِ سر ءَ اُرش کتگ؛ جعفری کور، ھواری چیک پوسٹ ءُ چائی جاہ بند کنگ ءُ بند کنگ بوتگ انت۔ اے وھد ءَ روگ ءُ آیگ ءِ گاڑی پٹ ءُ پول کنگ بوتگ اَنت۔
دمگی اھوالانی رد ءَ ھمے وھد ءَ کوسٹ گارڈز ءِ کیمپ ءَ را سلاہ بندیں مردمانی نشانگ جوڑ کتگ ب کہ ایشی ءِ آسر ءَ فورسز ءِ تاوان ءِ ھال شنگ بوتگ ءُ کوسٹ گارڈ پولیس ءِ پوسٹ نشانگ جوڑ کنگ بوتگ انت ءُ دستگیر کنگ بوتگ انت-
گْوستگیں دو روچ ءِ تہ ءَ بلوچستان ءِ جتا جتائیں دمگ، مستونگ، تربت، ھاران، گورکوپ، ھوشوپ، ڈیرہ بگٹی، مشکے، بولان، بلیدہ، زمران، ھیرونک، پنجگور، بارکھان، آواران، دکی، کوھلو، تمپ ءُ گوادر ءَ سِی ءَ گیش اُرش کنگ بوتگ انت۔
انگت ءَ ھچ گل ءَ اے اُرشانی زمہ واری نہ زرتگ انت بلے دمگی مردماں ٹی بی پی ءَ گْوشتگ کہ بلوچ سلاھبندیں آجوئی لوٹوک اے آپریشناں یکجاھی ءَ کنگ ءَ اَنت۔
یات بہ بیت کہ اے سال ءِ 25 ءُ 26 اگست ءِ شپ ءَ بلوچ لبریشن آرمی ءَ “آپریشن ھیروف” ءِ چیر دستی ءَ بلوچستان ءِ 13 دمگانی تہ ءَ آپریشن کنگ ءِ وھد ءَ مزنیں دگانی سر ءَ کنٹرول کتگ ات، وھدیکہ اے وھد ءِ تہ ءَ جنگی بنجل ، فورسز پوسٹ، ریل ءِ ٹریک ءُ پل، مڈی بروکیں گاڑی نشانگ جوڑ کنگ بوتگ انت وھدے کہ لیویز ءُ پولیس پوسٹانی سلاہ پچگرگ بوتگ انت –
بلوچ لبریشن آرمی ءِ آپریشن ھیروف ءِ وھد ءَ بیلہ ءَ سنگینیں اُرشے کتگ ات کہ اود ءَ بی ایل اے مجید برگیڈ ءِ فدائیناں پاکستان آرمی ءِ بیلہ ءِ بنجاھی بنجل ءِ سر ءَ اُرش کتگ ات ءُ دستیگ کتگ ات-