بلوچ راھشوناں مستونگ ءِ بمب تراک چکانی ناھکیں کوش ایر جتگ

بلوچ نیشنل موومنٹ ءِ چئیرمین ڈاکٹر نسیم ءُ راجدوستیں راھشون جاوید مینگل ءَ مستونگ بیتگیں وئیل ءَ چکانی ناھکیں کوش ایر جتگ-

بلوچ نیشنل موومنٹ ءِ چئیرمین ڈاکٹر نسیم بلوچ ءَ مستونگ ءَ کودکیں چکانی شھیدی ایر جتگ ءُ اش پشاور آرمی پبلک وانگجاہ ءِ وئیل ترانگ داتگ-

آئی ءَ گوشتگ کہ اے وئیل بلوچستان ءَ پاکستانی زوراکی ءِ پالیسیاں چہ دلگوش دیر کنگ جُھد اِنت ءُ پاکستان نیمگ ءَ چہ مزھبی ناشرکاراں بلوچ راج ءَ را تُرس آماچ کنگ ھاتر ءَ کارمرز کنگ ءِ دگہ یک وئیلے-

آئی ءَ گوشتگ کہ بلوچ راج دُژمن ءِ ھرچ پندلاں چہ شریں وڑے ءَ سرپدیں – ما اے زواکیاں بیھال نہ بہ ئے ایں ءُ ناں بکش ایں- آجو بلوچستان ءِ ھاتر ءَ مئے جُھد ھرچ پڑ ءَ برجاہ بنت-

ھمے وڑ راجدوستیں راھشون جاوید مینگل ءَ وتی شنگ کتگیں درشان ءِ تہ ءَ گْوشتگ کہ مستونگ ءَ وانگجاہ ءِ کودکیں چکانی سر ءَ بے دلیں اُرش ءُ بے میار، کودکیں چکانی شھیدی ریاستی ادارہ ءِ زوراکی ھد ءَ گیش اِنت – بلوچ راجی زرمبشت، ھاسکار سیاسی گھگیری ءِ لپاشگ ھاتر ءَ بے میاریں چکانی ھون ریتکگ اَنت – پاکستانی پوج وتی بے سوبی پردگ پر دیگ ھاتر ءَ ھمے وڑیں گامگیج زور اِیت، اے اُرشاں آئی ءِ جوڑ کتگیں مردم کن اَنت – میر جاوید مینگل ءَ گوشتگ کہ یکیں روچ ءَ مستونگ ءَ ھپت کودکیں مردم شھید کتگ اَنت – وھدے کہ چہ راولپنڈی ءَ دہ بلوچ نودربر زورانسری آوار جنی ءِ نشانگ کتگ اَنت – اے دوئیں وئیل ریاستی زوراکی ، بلوچ چُکچینی ءُ زلم ءِ پالیسیانی بھر اَنت-