سھیل بلوچ ءُ فصیح بلوچ ءِ یل نہ کنگ ءَ سے سال سرجم بیگ ءَ بلوچ اسٹوڈنٹس ایکشن کمیٹی نیمگ ءَ چہ بلوچستان شھدربرجاہ دو روچ نندانک گدان ءَ برجم داشتگ وھدے کہ نندانک ءِ گُڈی روچ ءَ بلوچستان شھدربرجاہ ءَ چہ شال پریس کلب ءَ تاں یک زھرشانی ئیں روانکے کشگ بیتگ-
زانگ بہ بیت بلوچستان شھدربرجاہ ءِ دو نودربر سھیل ءُ فصیح بلوچ کہ گوستگیں سے سالاں چہ زورانسری آوار جنی نشانگ اَنت، اش یک دو نومبر دوھزار بیست یک شپ ءَ بلوچستان شھردربرجاہ ءَ چہ زورانسری بیگواہ کتگ اَنت – آیانی یل نہ کنگ ءَ یکشل ءَ زھرشانی ءُ روانک کشگ بیگ ءَ اِنت، صوبائی ھکومت دلجمی دیگ ءُ پارلیمانی کمیٹی کولاں اَبید مروچی سے سال گوزگ ءَ پد ھم بے میاریں بلوچ نودربر یل کنگ نہ بیتگ اَنت-
اشانی زورانسری آوار جنی ءَ سے سال سرجم بیگ درگت ءَ نندانکیں گدان ءُ زھرشانی روانک کیمپئین برجم داشتگ چریشی ءَ شال ءَ بلوچستان شھدربرجاہ ءَ دو روچ نندانکیں گدان ءَ ھوار گدان ءَ چہ شال پریس کلب ءَ تاں زھرشانی روانک کشگ بیتگ وھدے کہ باندا ءُ پونشی بلوچستان ءِ دگہ شھراں باندا روچ شمبے ءَ کیچ، ھُزدار، اوتھل ءُ پونشی روچ یکشمبے ءَ نوشکی ءَ زھرشانی ئیں روانک کشگ بیت-
بساک راھشوناں گوشتگ کہ یک نیمگے ما بلوچ نودربرانی زورانسری آوار جنی ءِ ھلاپ ءَ زھرشانیاں ءُ دومی نیمگ ءَ ھمے روچ ءَ اسلام آباد ءَ دہ بلوچ نودربر زورانسری آوار جنی ءِ نشانگ کنگ یک بژنی گپے- اکتدار ءَ نشتگیں مردم بلوچ راج ءِ زندمان ءِ گوم ءَ ھون لیب کنگ ءَ اَنت – زورانسری آوار جنی یک بلاھیں جیڑھے کہ آئی ءِ تھنا ناں ما ایر جن ایں بلکیں ما بلوچ نودربرانی زورانسری آوار جنی ءِ ھلاپ ءَ گھگیری کن ایں-