ریاست ءُ آئی ءِ ڈیتھ اسکواڈ بے رھمی ءَ چہ بلوچستان کوشجاھے جوڑ کتگ- ڈاکٹر ماہ رنگ بلوچ

بلوچ راھشون ڈاکٹر ماہ رنگ بلوچ ءَ گوشتگ کہ مستونگ ءَ مروچی دردناکیں وئیل ءَ من آں بے کساس گمیگ کتگ ءُ منی دل ھمدردی ھمے چک ءُ دگہ مردمانی کھول ءَ اِنت کہ آیانی جان شتگ- اے گرانیں ساھت ءَ ما اشانی گوم ءَ یکجاھی ءَ اوشتاتگیں-

آئی ءَ گْوشتگ کہ مروچی سھب ءَ مستونگ ءَ یک وانگجاھے ءِ نزیک ءَ بیتگیں بمب تراک ءَ کہ آیانی تہ ءَ وانگجاہ کودکیں چک ءُ دگرانی جان شتگ اَنت، مارا لرزینتگیں – ریاست ءُ آئی ءِ ڈیتھ اسکواڈ ءَ بے رھمی ءَ چہ بلوچستان کوشجاھے جوڑ کتگ-

ڈاکٹر ءَ گوشتگ کہ اِد ءَ گوستگیں شپ ءَ چہ اسلام آباد ءَ دہ بلوچ نودربر زورانسری بیگواہ کنگ بیتگ اَنت- بلوچ نودبر زورانسری بیگواہ کتگ اَنت – بلوچ نودربرانی زورانسری ترسناکی ءَ بے گر ءُ دار ءَ برجاہ ءَ اِنت، تھنا گوستگیں ماہ ءَ درزنانی اے زوراکی ءِ آماچ بیتگ اَنت-

آئی ءَ گْوشتگ کہ یکیں روچ ءَ دو ھترناکیں وئیلاں بلوچ چاگرد ءِ برجاھیں رنج ، مسیبت ءُ دلسیاھی تچکی ءَ پدر بیت – بلوچ چکچینی ءِ جوڑ کتگیں پالیسی ءَ اود ءِ نندوکیں مردم یک نگیگیں جاور ءِ تہ ءَ دور داتگ اَنت-

دیمتر ءَ گوشتگ کہ اے دوئیں وئیل انسانی ھکانی یک بلاھیں ھلاپ ورزی یے ءُ برجاہ بلوچ چُکچینی ءَ گیشی ءَ پدر کنت، اے تُرندیں زلم ءُ زوراکی پیشدار اِیت چریشی ءِ رِد ءَ بلوچ راج زندمان گوازینگ ءَ لاچار اِنت-