سھیل ءُ فصیح بلوچ ءِ زورانسری آوار جنی ءَ سال، شال ءَ نودربرانی زھرشانی

نودربرانی نیمگ ءَ چہ سنگتیں نودربرانی یل نہ کنگ ءِ ھلاپ ءَ روانک ءُ زھرشانی نکش کنائینتگ-

سے سال ءَ ساری چہ بلوچستان شھدربرجاہ ءَ زورانسری آوار جنی ءِ نشانگ کنگ بیتگیں نوشکی ءِ جھمنند سھیل بلوچ ءُ فصیح بلوچ ءِ دراجکشیں بیگواھی ءُ یل نہ کنگ ءِ ھلاپ ءَ بلوچ اسٹوڈنٹس ایکشن نیمگ ءَ چہ شال ءَ روانک ءُ زھرشانی کنگ بیتگ-

نودربر بلوچستان شھدربرجاہ ءَ چہ شال پریس کلب ءَ تاں روانک ءُ پریس کلب دیم ءَ نندانک داتگ-

شال پریس کلب ءِ دیم ءَ نندانک ءَ چہ تران کنان ءَ ترانکاراں گوشتگ کہ بلوچستان بیگواھستان جوڑ بیتگ کہ اود ءَ تنی وھدے ھزرانی مردم درکانودی آوار جنگ ءُ بیگواہ کنگ بیتگ اَنت ءُ سالانی سال بے جرم ءَ بلوچ ورنا آزارجاھاں آزار اوپار کنگ ءَ اَنت-

ترانکاراں گوشتگ کہ بلوچستان ءَ زورانسری آوار جنی ءِ نشانگ کنگ بیتگیں نودربراں بگر دھکنکار، استاداں ھوار ھرچ پڑ ءِ سیادی داروکیں مردم ھوار اَنت ءُ مردم آیانی زانشتی ادارھاں چہ ھم بیگواہ کنگ بیگ ءَ اَنت-

زورانسری آوار جنی ءِ نشانگ کنگ بیتگیں سھیل ءُ فصیح بلوچ ءِ زورانسری آوار جنی ءِ درگت ءَ چہ زھرشانی کنوکانی گوشگ اِنت کہ سے سال ءَ ساری دوئیں نودربر آیانی ھاسٹل ءَ چہ بلوچستان شھردربرجاہ ءِ تہ ءَ پاکستانی پوج ءَ زورانسری آوار جتگ اَنت کہ سے سال گوزگ ءَ پد ھم دیم ءَ آرگ نہ بیتگ اَنت-

شال زھرشانی کنوکاں نودربر ءُ شھریانی ھمراھی ءَ دگہ زورانسری آوار جنی ءِ نشانگ کنگ بیتگیں مردم کھول ھم ھوار اَنت ءُ وتی بیگواھیں دوستناکانی یل کنگ لوٹ کتگ-

ترانکاراں دیمتر ءَ گوشتگ کہ یکرندے پد ءَ بلوچستان ءَ زورانسری آوار جنی تہ ءَ تُرندی آرگ بیتگ کہ اود ءَ بلوچستان ءُ دگہ دمگاں بلوچ نودربر زورانسری آوار جنی ءِ نشانگ کنگ بیگ ءَ اَنت، تھنا اکتوبر ماہ ءَ ھپتاد ءَ گیش مردم زورانسری آوار جنی ءِ نشانگ کنگ بیتگ اَنت آیانی تہ ءَ گیشتر نودربر اَنت ءُ آ چہ ھاسٹل ءُ لوگاں بیگواہ کتگ اَنت-

نودربراں لوٹ کتگ کہ میان اُستمانی انسانی ھکانی ادارہ ءُ پاکستان ءِ نودربریں گل اے زورانسری آوار جنی ءِ ھلاپ ءَ بہ اوشت اَنت ریاست ءَ چہ جُست بگر اَنت ءُ بلوچ نودربرانی یل کنائینگ ءَ وتی کرد ءَ پیلو بہ کن اَنت-