مھلوک ءَ شکایت کتگ کہ ایپ سی آھانی لوگ ءُ زمیناں زور ایت ءُ چیک پوسٹ جوڑ کنگ ءَ انت۔
گیشیں اھوالانی رد ءَ پاکستانی لشکر ءَ مند ءِ دمگ ءَ لوگ ءُ زمینانی سر ءَ بیڑ برگ ءُ چیک پوسٹ جوڑ کنگ ءَ انت کہ ایشی ءِ ھلاپ ءَ مھلوک ءَ مرچی زھرشانی یاداشت کتگ۔
بلوچستان ءِ کیچ دمگ ءِ مند ت مرچی مردین، جنین ءُ زھگاں دگ ءِ سر ءَ دراتکگ انت ءُ پاکستانی لشکر ءِ زورگری ءِ ھلاپ ءَ اوگام جنگ ءِ وھد ءَ ٹریفک راہ بند کتگ۔
آیاں لوٹ کتگ کہ ما وتی لوگ ءُ جاگھاں واتر لوٹ ایں-
مھلوک ءِ گشگ انت کہ مھیر ءَ لشکر ءَ آھانی لوگ وتی دست ءَ کتگ انت ءُُ آھانی سرا چیک پوسٹ ایر کتگ انت ءُُ نوں نزیکیں زمیناں ھم دستیگ کنگ ءَ اِنت-
زھرشانی کنوکاں گْوشتگ کہ لشکر ءَ نہ ایوک ءَ آیانی لوگ بلکیں زھگانی وانگجاہ ھم دستیگ کتگ ایف سی ءِ کارندھاں اسکول ءِ چھت ءَ سنگر جوڑ کتگ کہ ایشی ءَ چہ زھگ ءُ زالبولیں استادانی تہ ءَ ترس ءُ بیم شنگ بوتگ، نوں مھلوک ءِ نندگ ءِ لوگ ھم چیک پوسٹ جوڑ کنگ بوھگ ءَ اَنت کہ مھلوک دگہ برداشت نہ کنت۔
مھلوک ءِ گشگ انت کہ فورسز ءَ مارا لوگ ءُ زمینانی رسگ ءَ ھم بندش جتگ ءُ مھلوک ءَ را دھمکی داتگ کہ اگاں آیاں زھرشانی کت گڑا گیشتر تاوان رس ایت۔
مند مھیر ءِ نندوکیں مردماں ترندیں بگیر کنان ءَ سرکاری ادارھاں چہ دزبندی کتگ ءُ لوٹ کتگ کہ آہانی لوگ ءُ زمین چہ لشکر ءِ دست ءَ پچگرگ بہ بنت۔ اگاں نہ آ مجبور بہ ایں سک زھرشانی بہ کن ایں-