بلوچستان ءَ مردماں پھاز دیگ جاگہ سیکورٹی فورسز چُکچینی ءَ ھمگرنچ اِنت- بلوچ یکجھتی کمیٹی

بلوچ یکجھتی کمیٹی ءَ وتی شنگ کتگیں درشان ءِ تہ ءَ گوشتگ کہ بی وائی سی مستونگ ءَ بیتگیں ناشرکاری اُرش ءَ تُرندیں لبزاں گوں ایر جنت، چریشی ءِ گرانبھائیں جان شتگ اَنت – مروچی سھب ءَ یک نومبر ءَ کساس ھشت ءُ نیم ءَ اے دلپدردناکیں اُرش بیتگ، چریشی ءَ پنچ بے میاریں نودربر ءُ دو پولیس کارمند بیران بیتگ اَنت-

درشان ءِ تہ ءَ گوشگ بیتگ کہ مستونگ ءَ ھمکروچ اے وڑیں بیگ ءَ اَنت کہ اود ءَ مردمانی جان رو اَنت ءَ ھرچ گوستگیں روچ ءِ ھمراھی ءَ چُکچینی ءِ ٹپ مزن بیگ ءَ اِنت- اشی ءَ اَبید کانود جوڑ کنوکیں ادارہ ھکومت بے میاریں تواراں ایرموش ءُ ایردستیں مردماں بے توار پالیسی ءَ گوں دلگوش اِنت-

بلوچ یکجھتی کمیٹی ءِ رِد ءَ ریاست سیکورٹی فورسز سر ءَ اربانی کلدار ھرچ کنت، راج ءِ پھازگ ءَ بے سوب گندگ آیگ جاگہ شھریاں پھازگ ءَ گیش شھریانی ھکانی ایرموش ءَ گوں دلگوش اِنت-

آئی ءَ گوشتگ کہ بلوچستان ءَ ریاست اے وڑیں پالیسیاں تُرس ودی کنت، بلوچ راج سرپد اِنت اے اُرشانی پُشدر ءَ کے اِنت اے ریاست ءِ پلامرزی ھما ناشرکار ٹولی اِنت کہ ھاس مپادانی ھاتر ءَ کارمرز بیگ ءَ اَنت-

بلوچ یکجھتی کمیٹی ءَ میان استمانی انسانی ھکانی گلاں چہ دزبندی کتگ کہ آ بلوچستان ءِ مردمانی کُشتکشار ءِ دارگ ھاتر ءَ زوت گامگیج بزور اَنت-