روکپتی بلوچستان ءِ دمگ ایرانشھر ءَ ناشناسیں مردماں یک مردمے آوار جنگ ءَ پد کشتگ ءُ چگل داتگ-
گیشیں اھوالانی رد ءَ ایرانشھر ءَ پجار نہ بوتگیں سلاہ بندیں پنچ مردماں بلوچ ورنایے گوں زوراکی ءُ توپک ءِ بیم دیگ ءَ آوار جتگ ءُ بُرتگ ،ھمے روچ ءَ ایرانشھر ءِ دمگ دمن (دامن) ءَ آئی ءِ لاش دزکپتگ-
بیران بیتگیں بلوچ ورنا ءِ پجار یاسین سُھرابزھی ایرانشھر ءِ جھمنند زانگ بیتگ۔
وئیل ءِ درگت ءَ دگہ گیشیں سرپدی نہ بیتگ اَنت-
ھمے وڑ ءَ ھاش ءَ سیمسر ءَ کَل کرتگیں شوروانی تراک ءَ یک مردمے بیران بیتگ-
بیران بیتگیں مردم ءِ پجار بھمن شھنوازی ء شربت ءِ نام ءَ زانگ بیتگ ءُ ھاش ءِ جھمنند اِنت-
اھوالانی رد ءَ بھمن سیمسر ءَ تیل واپاری ءَ گوں بندوک بیتگ ءُ روگ ءَ بیتگ کہ آئی ءِ گاڑی ءَ ناشناسیں شورو لگ داتگ ءُ چریشی ءَ چہ آ زدگ بیتگ ءُ نادراہ جاہ ءَ برگ بیتگ کہ اود ءَ آئی ءَ وتی ساہ داتگ اَنت-