مرگ -ثناء کریم

مرگ

نبشتہ کار: ثناء کریم

دی بلوچستان پوسٹ

اے یک راستیں گپے کہ زندگی ءَ گیشتریں مردم مئے میان ءَ بہ بنت گڑا آھانی کدر ءُ کیمت ءَ نہ کن انت بلے چہ دنیا ءَ روگ ءَ پد آھانی بابت ءَ گیشتر گپ جنگ ءُ یات کنگ بیت۔ اے گپ ءَ گوں انسان ءِ نپسیات، چاگردی لیکہ ءُ وھد ءِ اهمیت ءَ سیادی ھست۔

زندگی ءِ تہ ءَ مردم وتی کار، واھگ ءُ جیڑھانی تہ ءَ انچوش دست گٹ بنت کہ آ دگر ءِ ارزشت ءُ وھد ءَ ھچ وڑ ءَ سرپد نہ بنت۔ مئے گیشتریں مردم وتی نزیکیں مردمانی ھست بیگ ءَ پہ ھچ نہ لیک اَنت۔ بلے وھدے آ مردم دنیا ءَ یلہ کن انت گڑا آھانی ھست بوگ ءِ اهمیت پدر بیت ءُ پشومانی ءِ ساس گیش بیت۔

انسان ءِ زندگ بیگ ءِ وھد ءَ گیشتر آئی ءِ ایبانی سر ءَ دلگوش دیگ بیت۔ ما مردمانی کمّیاں یات کن ایں ءُ ایرجن ایں بلے وھدے کہ آ مردم گار بیت گڑا مارا آئی ءِ شرّی یات کاینت۔ اے انسان ءِ ابرم اِنت (فطرت) اِنت کہ ما مرگ ءَ پد مردمانی سپاتانی سر ءَ گیشتر دلگوش دئیں ءُ آھانی ایباں شموشیں۔

مردم ءِ مرگ ءَ چہ مردم ءَ زند ءِ ادارکیءِ سسا بیت۔ مرگ مئے دل ءَ یک ھالیگیں جاھے یلہ دنت ءُ ما ھما ھالیگیں جاہ ءَ پُر کنگ ءِ ھاترا مرگ ءَ یات کنیں۔ اے ھم یک کدرت ءِ کارے ￵ کہ ایشی ءِ وسیلہ ءَ ما وتی مھر ءُ گم ءِ درشان ءَ کنیں۔

چاگردی دود ءُ ربیدگ ءُ دلپدردی کسے ءِ بیرانی ءَ دلپدردی کنگ ءُ بیران بوتگیں مردم ءَ گوں نیکیں گپاں یات کنگ چاگردی دود ءُ ربیدگانی بھر اِنت۔ اے وڑیں وھداں مردم بیران بوتگیں مردم ءِ بابت ءَ وتی ھیالاں درشان کن اَنت آئی ءِ نیکیں کاراں یات کن اَنت ءُ دُوا ءُ کن اَنت۔ مرگ چوش کہ یک انچیں موھے جوڑ بیت کہ آئی ءِ تہ ءَ مردم وتی اھساس ءُ مھرے درشان ءَ کن انت۔

بے پرواھی ءُ پشومانی وھدے کہ کسے مئے میان ءَ زندگ اِنت گڑا ما آئی ءِ ارزشت ءَ سرپد نہ بئیں بلے مرگ ءَ پد ما سرپد بئیں کہ ما گوں آئی ءَ وھد گوازینگ ءِ موہ گار کتگ۔ ھمے پشومانی ءِ سوب ءَ ما گیشتر بیران بوتگیں مردمانی بابت ءَ جیڑیں ءُ آئی ءِ سپاتاں یات کنیں۔

زندگی ءِ تہ ءَ دگرانی کدر کنگ، آھانی مھر ءِ اھساس ءُ آھانی گوں شریں ھمگرنچی ءِ برجاہ دارگ ھما درستیں چیز انت کہ ما وتی زندگی ءَ ھوار بہ کنیں کہ مرگ ءَ پد پشومانی ءَ چہ بچگ بہ بیت۔ مرگ ءَ پد ءِ یات مارا اے سما ءَ دنت کہ زند ءِ ھر ساھت گران بھائیں چیزے ءُ ما وتی دوستیں مردماں ھما مھر ءُ اھترام ءُ ارزشت ءَ بہ دئیں کہ آ زند ءِ تہ ءَ ھست اَنت۔