ھاران : انتزامیہ ءَ دلجمی دیگ ءَ بیگواھیں مردمانی کھول نندانک ھلاس

بیگواھیں مردمانی کھول ءَ ھکومتی دمگی واکدار ءَ چہ گپ دیوان ءَ پد گوستگیں بازیں روچاں چہ برجاھیں نندانک ھلاس کتگ-

چہ ھاران ءَ زورانسری آوار جنی نشانگ بیتگیں عبیداللہ تکاپی ءِ کھول ءُ بلوچ یکجھتی کمیٹی ءِ نیمگ ءَ چہ ھاران ریڈزون ءَ برجاھیں نندانک ءَ مروچی گپ دیوان ءُ دلجمی دیگ ءَ پد ھلاس کتگ-

صوبائی وزیر ءُ ایم پی اے ھاران شعیب نوشیروانی بیگواہ عبیدتگاپی ءِ یل نہ کنگ ھلاپ ءُ نودربرانی نیمگ ءَ چہ بی وائی سی کارکناں نودربریں راھشون عزیز اکرم، آصف نور، مظفر بلوچ سر ءَ ایف آئی آر ھلاپ ءَ ھاران ریڈزون ءَ برجاھیں زھرشانی ئیں نندانکجاہ ءَ گدان ءَ اتکگ ءُ اود آیاں کھول بی وائی سی کارکناں چہ گپ دیوان کتگ-

واکدار ءَ یک ھپتگے ءَ تاں بیگواھیں عبید تگاپی ءِ یل کنگ ءُ سئیں نودربر ایم پی اے ءُ ڈی سی زمہ واری سر ءَ دزگیر نہ کنگ ءُ ایف آئی آر ھلاس کنگ دلجمی داتگ چریشی ءَ پد کھول بلوچ یکجھتی کمیٹی ءُ نودبراں زھرشانی نندانک ھلاس کتگ-

زانگ بہ بیت کہ دو ھپتگ ءَ ساری چہ ھاران ءَ عبیداللہ تکاپی ءَ زورانسری آوار جنی ءِ نشانگ کنگ بیتگ چریشی ءِ ھلاپ ءَ کھول ءِ ھمراھی ءَ بلوچ یکجھتی کمیٹی ءَ ھاران ریڈزون نزیک ءَ شال دگ سر ءَ گدان برجم داشتگ ءُ نندانک داتگ-

ھاران پولیس ءَ گوستگیں روچ ءَ نندانک دیگ ءُ دگ بند کنگ سر ءَ زھرشانی کنوکانی ھلاپ ءَ ایف آئی آر درج کنان ءَ بلوچ یکجھتی کمیٹی ھاران زمہ وار نام دپ کتگ اَنت-