بلوچ یکجھتی کمیٹی ءِ کمپین ءِ سرھال ” ھاموشی ءِ پروشگ: زوراکیں بیگواھیانی ھلاپ ءَ اوشتگ “ ءِ تہ ءَ دالبندین ءَ زھرشانی ریکارڈ کنگ بوتگ۔
بلوچ یکجھتی کمیٹی ءِ گوانک ءِ پد ءَ دالبندین ءَ بیگواھیں مردمانی سیاد ءُ شھریانی نیمگ ءَ زھرشانی روانکے کشگ بوتگ کہ چہ عرب مسیت ءَ بندات بوتگ ءُ شھر ءِ مستریں شاہراہ ءَ چہ دالبندین پریس کلب ءِ دیم ءَ سر بوتگ۔
مچی ءِ تہ ءَ بھر زوروکاں دالبندین پریس کلب ءِ دیم ءَ زھرشانی کتگ، روانک ءَ زورانسری بیگواہ کنگ بوتگیں مردمانی سیاد ءُ وارس ہم ھوار بوتگ انت۔
غلام اللہ ءِ برات ءُ عامر بلوچ ءَ چہ مچی ءَ بیگواھیں مردماں گوں تران کت، بیگواھیں مردماں زوت یل کنگ بہ بنت، سڑکاں آشوب انت بلے مارا انساپ نہ رسگ ءَ انت ءُ بلوچستان ءِ گیشتر ورنا بیگواہ بوھگ ءَ انت۔
سیاد ءُ وارساں لوٹ کتگ کہ دراہیں بیگواہیں مردم دیم ءَ آرگ بہ بنت ءُ آمیدگساں پیش کنگ بہ بنت، اگاں آھاں ھرچ وڑیں جرمے کتگ گڑا آہانی سر ءَ کیس کنگ بہ بیت۔
بلوچ یکجھتی کمیٹی ءِ کمپین ءِ سرھال “ھاموشی ءِ پروشگ : زوراکیں بیگواھیانی ھلاپ ءَ اوشتگ” بلوچستان ءِ جتا جتائیں دمگاں زھرشانی کنگ بوتگ کہ اودا پیسر ءَ کراچی، حب چوکی، خضدار، تربت، پنجگور، خاران، کوئٹہ، نوشکی ءَ زھرشانی ریکارڈ بوتگ انت ءُ مرچی دالبندین ءَ بوتگ۔