بلوچ اسٹوڈنٹس ایکشن کمیٹی ءَ وتی شنگ کتگیں درشان ءَ گوشتگ گل ءِ گوستگیں ھنکینی زمہ دار ءُ دلیریں سیاسی جھدکار سنگت حمیدہ بلوچ ءِ بیرانی ءَ پدرد ایں۔ سنگت حمیدہ بلوچ گل ءِ اوتھل ھنکین ءِ گوستگیں کمک کارمستر بیتگ ءُ وتی نودربر سیاست ءِ تہ ءَ سرگرمیں ءُ املی ئیں سنگتے اَت کہ مُدام پہ بلوچ نودربرانی سیاسی تربیت ءُ سیاسی جھد ءَ اولی سرپ ءَ اوشتوک اَت۔ آئی ءَ چہ لوامز اوتھل ءَ پولیٹکل سائنس ءَ گریجویشن کتگ ءُ بنیاتی سیادی آواران ءِ میتگ تیرتیج ءَ بیتگ۔ آ سیاسی جھدکاریے ءَ ھوار جوانیں نبشتہ کارئے ہم بوتگ۔ ما آئی ءِ جھد ءُ زِند ءِ کموکیں ساھتاں گوں سیاسی سِنچ ءُ سما ءَ گوازینتگیں زِند ءَ دروت ندر کن ایں۔
آئی ءَ گوشتگ سنگت حمیدہ بلوچ گوستگیں لھتے سالاں شُمُک ءِ نادراھی ءِ آماچ بیتگ ءُ پہ الاج ءَ نادراہ جاہ ءَ الاج ءَ بیتگ اے نادراھی ءِ گرانیں ساھتاں آ زِند ءُ مرگ ءِ میان ءَ گوں سکیاں مڑگ ءَ اَت کہ گُڈسر ءَ کراچی ءَ وتی ساھے دات اَنت۔
آئی ءَ گوشتگ نادراھی ءِ ساھتاں ہم آئی ءِ پگر ءُ جزبگ چو مھکمیں کلات ءَ بُرز ءُ توانا اِت اِنت ءُ مدام ھمے گوشگ ءَ اَت کہ نادراھی ءَ شر بہ باں رواں راج ءِ ھاتر ءَ وتی جھد ءَ برجاہ داراں۔ مرگ ءُ زِند ءِ میان ءَ گوزوکیں بلوچ پُسگانی چو مھکمی ءُ تمردی ءَ پہ بلوچ راجی جھد ءَ اوشتگ مئے راجی سِنچ ءُ سما ءِ سوبینی ءُ بدواہ ءِ مرگ اِنت۔ اے گرانیں ساھتاں ہم آئی ءِ جزبگ ءُ پگر پہ راج ءِ ہاتر ءَ جھد کنگ، دلیریں، مھکمیں ءُ املی ئیں سیاسی جھدکاریے ءِ چیدگ اَنت۔
آئی ءَ گوشتگ بلوچستان ءَ شریں نادراہ جاہ ءُ الکاپیں تبی آسراتی نہ بیگ ءِ سوب ءَ بلوچ راج چہ جوانیں پُسگ ءُ سیاسی جہمھدکاراں زبھر بیگ ءَ اِنت۔ شُمُک ءِ نادراھی بلوچستان ءَ انچو تیزی ءَ گوں تالان بیگ ءَ اِنت کہ اشی ءِ گِر ءُ دار ءَ پہ نہ شھمیں نادراہ جاھے ھست ءُ ناکہ دگہ آسراتی یے۔ جاور انچو جوڑ بیتگ اَنت کہ شُمک ءِ نادراھی ءَ ھوار یک کسانیں نادراھی یے ءِ الاج ہم بیت نہ کنت ءُ نازاکیں انسانی ساھاں پُل ایت۔ اگاں مارا شھمیں تبی آسراتی بیتیں بلوچ پُسگ چو گُشادی ءَ مرگ ءِ ارجان نہ بیتگ اِت اَنت بلے بلوچ یک انچیں سیاہ شپے ءَ گِپتگ کہ کسانیں نادراھیی ءُ ویلے ھم آئی ءَ گوں مرگ ءَ دیمپان کنت۔
آئی ءَ گوشتگ گل نمیرانیں سنگت ءِ جہد ءُ پگر ءَ دروت ندر کنت ءُ آئی ءِ کرد ءَ پہ دگراں جھد ءُ امل ءِ چیدگ جوڈ بیگ ءَ سکین ءَ دنت۔ سنگت حمیدہ ءِ وڈیں سیاسی جھدکار بلوچ ءِ ایدگہ نودربر ءُ جھدکارانی واستا مزنیں درور بہ بنت کہ بلوچ پُسگانی گور ءَ مرگ ءِ ساھت ءَ ھم بلوچ، بلوچی ءُ بلوچستان ءِ پگر مھکم ءُ توانا بہ بیت انت۔