زاھدان ءُ ایرانشھر ءَ پیش اتکگیں وئیلاں زالبولے بیران، دو مردم زدگ

زاھدان ءَ مرد ءَ وتی لوگبانک لٹ ءُ کٹ کتگ ءُ کُشتگ-

گیشیں اھوالانی رد ءَ روکپتی بلوچستان ءِ بنجاھی شھر زاھدان ءَ مرد ءَ وتی لوگبانک لٹ ءُ کٹ کتگ ءُ چریشی ءَ پد آ نادراہ جاہ ءَ برتگ ءُ اود ءَ آئی ءَ وتی ساہ داتگ اَنت-

بیران بیتگیں زالبول ءِ پجار آئشہ ء عبدالکریم ءِ نام ءَ زانگ بیتگ ءُ آ ھاش جھمنند گوشگ بیتگ-

اھوالانی رد ءَ وئیل لوگی جیڑہ ءِ سبب ءَ پیش اتکگ کہ وت ماں وت گپ ءُ ٹالانی سبب ءَ مرد ءَ وتی لوگبانک لٹ ءُ کٹ کتگ ءُ چریشی ءَ چہ آ بیران بیتگ-

ھمے ڈول ءَ ایرانشھر ءَ دگ ءِ وئیلے ءَ دو مردم زدگ بیتگ اَنت-

اھوالانی رد ءَ ایرانشھر ءُ ھاش ءِ شھدگ ءَ یک گاڑی یے چپ بیتگ ءُ چریشی ءَ چہ دو مردم ٹپی بیتگ اَنت-

ٹپی بیتگیں مردمانی پجار ھپیز اللہ ءُ مھمود شاہ بکش ءِ نام ءَ زانگ بیتگ اَنت ءُ ھردوک زاھدان ءِ جھمنند گوشگ بیتگ اَنت-