بلوچ زورانسری آوار جنی ءِ ھلاپ ءَ شال ءَ زھرشانی

بی وائی سی ءِ نیمگ ءَ برجم دارگ بیتگیں بلوچ زورانسری آوار جنیانی ھلاپ ءَ شال ءَ روانک ءُ زھرشانی کنگ بیتگ-

بلوچ یکجھتی کمیٹی ءِ برجم دارگ بیتگیں زورانسری آوار جنیانی ھلاپ ءُ بیگواھیں مردمانی یل کنائینگ ھاتر ءَ ڈاکٹر ماہ رنگ بلوچ ءُ بیگواھیں مردمانی کھول ءِ سروکی ءَ سریاب دگ یونیورسٹی چوک ءَ چہ روانک کش اِتگ کہ جتاجتائیں دگاں چہ روان عبدالستار ایدھی چوک سر ءَ سر بیتگ زھرشانی ئیں دروشم ءَ اَتکگ-

روانک ءَ ھواریں مردماں بینرز، پلے کارڈ ءُ بیگواھیں مردمانی اکس چست کتگ بیتگ اَنت ، زھرشانی ءَ بلوچ بیگواھیں مردمانی مزنیں کچے ءَ ھوار بیتگ اَنت-

بلوچ یکجھتی کمیٹی ءِ مھم، بے تواری ءِ پروش : زورانسری آوار جنیانی ھلاپ ءَ اوشتاتگ ” ءِ سرھال ءَ چہ بلوچستان ءِ جتاجتائیں دمگاان زھرشانی درچ برجاہ ءَ اِنت اود ءَ اشی ءَ ساری کراچی، ھب چوکی، ھُزدار، تربت، پنجگور ءُ مروچی ھاران ءَ زھرشانی نکش کنائینتگ-

نندانک ءَ ھواریں مردماں چہ تران کنان ءَ ڈاکٹر ماہ رنگ بلوچ ، غلام نبی مری ءُ دگراں گوشتگ کہ مئے زھرشانی بیگواھیں مردمانی یل کنائینگ ءُ اشی ءَ ھمگرنچ مردماں چہ بلوچستان ءَ درکنگ ھاتر ءَ اِنت-

آئی ءَ گوشتگ کہ مئے پُرایمنیں زھرشانی ءُ بیگواھیں مردمانی کھول وتی دوستناکانی یل کنائینگ ھاتر ءَ ھمینچو گر ءُ دار کتگ ما ھمینچو مھکم ءُ مُھر جوڑ بیتگ چست بیتگیں مئے راجدپتر گواہ اِنت کہ وھدے ادارہ بلوچاں زورانسری دارگ جھد کتگ ما پد ءَ ھم تُرند، تاکت ءُ مھکمی گوم ءَ درتکگ ءُ چست بیتگیں، بلوچستان ءَ زورانسری آوار جنی ءِ ھلاپ ءُ بیگواھیں مردم پہ سلامتی یل کنائینگ ھاتر ءَ مروچی اے روانک ءُ نندانک توانمندانی واستا یک تچکیں کلوھے-

نندانک ءَ تران کنان ءَ گوشتگ کہ اے وڑ زھرشانی ءَ چہ ذاکر مجید درتکگ ءُ دگہ ھم درتکگ اَنت پرچاکہ اے مچی ءُ زھرشانی بامرد ودی کنت کہ آزارجاھاں ھم بلوچانی واستا ناراہ جنگ بیت ھما وتی زمیر ءَ بھا نہ کنت آ مئے واستا کابل شرپ اِنت-

تراکنکاراں گوشتگ کہ مروچی اے پُرایمن زھرشانی ءَ دراجکشیں لوٹ اِنت کہ مئے سرڈگار سر ءَ زورانسری آوار جنی ءَ ھمگرنچ مردماں اد ءَ چہ درکنگ اِنت ءُ مئے زھرشانی زورانسری آوار جنگ بیتگینانی کھول دلجمی لوٹ دے ایں کہ آ وتی کاگداں بلوچ یکجھتی کمیٹی گور ءَ بہ کن اَنت دانکہ بیگواھیں مردماں یل کنائینگ ممکن جوڑ بہ کنگ بہ بیت-

دیمتر ءَ زھرشانی کنوکاں بیگواھیں مردمانی یل کنائینگ ءُ وتی لوٹانی ھک ءَ ناراہ جتگ ءُ پرایمن گوم ءَ شنگ شانگ بیتگ اَنت-