مند : شھریاں سرکاری سروکی ءَ لُٹ ءُ پُل ءُ ڈنگیانی ھلاپ ءَ زھرشانی کتگ

بلوچستان ءِ دمگ مند ءِ شھر ءَ شپ ءِ وھد ءَ سلاہ بندیں مردمانی نیمگ ءَ چہ لُٹ ءُ پُل ءُ ناشرکاریانی ھلاپ ءَ زھرشانی کتگ-

زھرشانی کنوکانی گوشگ اِنت کہ اشانی لوگاں پترگ ءُ آیاں لُٹ ءُ پُل کنگ ءَ اَنت ءُ سکیورٹی کارمند اے درگت ءَ چہ ھچ وڑیں گامگیج زیرگ ءَ نہ اَنت ءُ اے وڑیں ٹولیانی سروکی سرکاری نیمگ ءَ چہ کنگ بیگ ءَ اَنت-

مند ءِ شھریاں بھتام جتگ کہ سیاسی مردم ءُ راجی نمائندگ شری ءَ زان اَنت کہ اے سلاہ بندیں مردم کے اَنت ءُ کئی گوشگ ءِ پد ءَ کاروائی ءَ کنگ ءَ اَنت- آیاں دیمتر ءَ گوشتگ کہ آیانی گور ءَ سلاہ ءُ سیکیورٹی کجا چہ کاینت راج اشاں درستاں زانت-

زھرشانی کنوکانی گوشتگ اِنت کہ اگاں اے درچتگیں نمائندگ ءَ اے سلاہ بندیں مردمانی دزگیری واستا اگاں تُرندیں گامگیج زیرگ نہ بیت گُڑا تُرندیں زھرشانی کن ایں-

زھرشانی کنوکاں اے ھم گوشتگ سکیورٹی کارمند اشانی ھلاپ ءَ ایف آئی آر نکش کنگ ءَ نہ اَنت- آیاں گوشتگ کہ سکیورٹی ءِ کار شھریانی پھاز دیگ اِنت بلے اد ءَ سکیورٹی کارمند وتی پھازگ ءَ دلگوش اَنت-