بلوچ اسٹوڈنٹس ایکشن کمیٹی شھدربرجاہ لاء کالج بُنزہ ءِ بُنزھی دیوان گوستگیں کارمستر واسع بلوچ ءِ سروکی ءَ برجم دارگ بوت۔ دیوان ءِ ھاسیں مھمان ھنکینی کارمستر فھد بلوچ ءُ ھنکینی ھالرسانی کارگشاد بیبگر بلوچ اِت اَنت۔
دیوان ءِ تہ ءَ جتا جتائیں سرھالانی سر ءَ گپ ءُ تران، ھنکینی سرکولر، بُنزھی رپورٹ ،نگدکاری نیاد ،تنظیمی امور ،ھندی ءُ میان اُستمانی سیاسی جاورھال ،آؤکیں گامگیج ھوار بیتگ اَنت-
شنگ بیتگیں درشان ءَ گوشگ بیتگ دیوان ءِ اولی سرھال ھنکینی سرکولر اَت کہ آئی ءِ تہ ءَ ھنکینی سنگت ءَ ھنکینی سرکولر دیوان ءِ دیم ءَ ونت ءُ ھنکین ءِ نیمگ ءَ چہ زرتگیں سوڑگ ءُ ھدایت نامه دیوان ءِ دیم ءَ گُشت اَنت۔ سنگتانی جست ءَ چہ رَند اے ایجنڈا بند کنگ بوت۔
آیاں گوشتگ دیمتری سرھال بُنزھی رپورٹ اَت کہ دیوان ءِ دیم ءَ پچ کنگ بوت، ایشی ءِ تہ ءَ بُنزہ ءِ رپورٹ وانگ بوت، رپورٹ ءِ تہ ءَ بُنزھی پروگرام، ھیلکاری سرکل، کابینہ دیوان ءُ اے دگہ کمیٹیانی رپورٹ ھوار اِت انت۔
شنگ بیتگیں درشان ءَ گوشگ بیتگ دیمتری سرھال نگد کاری نیاد اَت، ایشی ءِ تہ ءَ سنگتاں وتی گوستگیں کارانی سر ءَ نگد کنان ءَ وتی ھمک نزوری ءُ کوتاھیانی سر ءَ ڈسکشن کُرت۔ سنگتاں نگد کنان ءَ گُشت کہ گل چُشکہ بلوچ نودربرانی سیاسی ھیلکاریانی واست ءَ کار کنگ ءَ انت، بلے اد ءَ لاء کالج ءَ انگت ءَ چُشیں ترتیبے جوڈ نہ انت، چُشکہ ما لاء کالج ءِ نودربر ایں ءُ مارا اے سما انت کہ اد ءَ یکے وَ ایش انت کہ مئے بلوچ نودربرانی کچ کم انت دومی اے کالج ءِ جند اوں اِنچو مزن ھم نہ اِنت، بلے باز وھد انت کہ مئے سنگت یک لُکّیں سرکلے ءِ بھر انت، اے سبب ءَ ما دومی سنگتان ءَ وتی گل ءِ لیکہ ءِ سر کنگ ءَ سوبمند بوگ ءَ نہ ایں۔
دیوان ءَ بھر زیروکیں باسکاں گوں دلجمی ءَ وتی نگد ایر کنان ءَ گُشت کہ نگد ھما سرھال انت کہ ایشی ءَ گوں جوانی ءَ سرپد بوگ باز المی انت، چیا کہ ما وتی نگد گڑا جْوانی ءَ گوں گل ءِ کار ءُ مراگشانی سر ءَ ایر کرت کنیں، مئے مستریں زمہ واری ھمیش انت کہ گل ءِ لیکہ ءَ ھمک بلوچ نودربر ءَ سر کنگ بہ بیت ءُ وتی باسک ءُ باھوانی سیاسی ءُ اِلمی تربیت کنگ بہ بیت، اگاں ما اے چیزانی تہ ءَ نزوری بہ کنیں گڑا ھمے نزوری چہ نگد ءِ اَمل ءَ گِرگ ءُ ھلاس کرت کنیں۔ سنگتانی کلیں نگد کنگ ءَ پد اے سرھال بند کنگ بوت۔
آیاں گوشتگ دیمتری ایجنڈا گل کاری اَت کہ سنگتاں گوں دلجمی ءَ گپ ءُ باوست کت ءُ گل ءِ کارانی دیمروی ءِ واست ءَ وتی وتی تجویز دیوان ءِ دیم ءَ ایر کت اَنت۔ سنگتاں گُشت کہ ما گوں یک ادارھے ءَ بندوک انت اد ءَ بلوچستان ءِ بازیں ھند ءُ دمگاں چہ نودربر کاینت داھلہ زور اَنت ایشانی سیاسی ءُ راجی تربیت کنگ ءِ واست ءَ گامگیج زورگ مئے مکسد ءَ دیم ءَ برگ ءِ وسیلہ بیت۔ ایشی ءِ ھواری ءَ مارا لوٹ اِیت کہ ما وتی ءُ وتی سنگتانی سیاسی ءُ المی تربیت ءِ گیش کنگ ءِ واست ءَ نوکیں مراگش ءُ کار دیم ءَ بیاریں ءُ اڑ بہ دے اِیں۔
ھنکینی باسک ءَ اے سرھال ءِ سر ءَ گپ کنان ءَ گُشتگ کہ ما کل گل ءِ باسک ایں ءُ گوں جْوانی ءَ اے گپ ءَ سرپدیں کہ گل ھما وھد ءَ دیمروی کنت وھدے گل ءِ باھو گوں وانگ ءَ ھمگرنچ بہ بنت ءُ وتی وتی بودشتانی ھساب ءَ گل ءِ کارانی توک ءَ وتی کرد ءَ پیلو بہ کن اَنت۔ سنگتاں گُشت کہ گوں زمہ داراں ھوار گل ءِ کلیں باسک گل ءِ جھگیری ءَ کنگ ءَ اَنت، ءُ کلیں باسکاں کنگی انت ھم، گڑا سنگتانی واست ءَ الّم اِنت کہ سنگت وت ءَ را سرجمی ءَ گوں گل ءِ لیکہ ءَ بندوک بہ کن اَنت ءُ گل ءِ کارانی توک ءَ گوں دلجمی ءَ بھر بہ زور اَنت۔
آئی ءَ گوشتگ وھدے باسک نزور بنت گڑا گل ءِ کار ھم اوشت ءِ آماچ بنت، وھدے گل ءِ کار کہ اوشت ءِ آماچ بنت گڑا گل ءِ مکسد ءَ سر بوگ ءِ واست ءَ مارا گیش ءَ چہ گیش وھد درکار بیت کنت۔ پمیشکا الّمی اِنت کہ باسک وتی زمہ داریاں بہ پھم اَنت ءُ ھچ وڑیں اَملے ءِ بھر مہ بنت کہ چرائی ءَ گل ءَ تاوان بہ رس اِیت۔
سنگت ءَ دیمترا گپ جنان ءَ گُشت کہ باسک مدام جھد بہ کن اَنت کہ وتی گیشتریں وھد ءَ گوں کتاب ءِ وانگ ءَ بہ گوازین اَنت، چیا کہ وانگ ھما چیز اِنت کہ یک سیاسی باسکے ءِ واست ءَ الّمی ئیں چیزے، وانگ گل ءِ باسکاں چه بے اَملی ءَ دور کنت ءُ بااَملیں انسان جوڑ بیت۔
آئی ءَ گوشتگ دیمتر ءَ تران کنان ءَ گُشت کہ ما اے گپ ءَ سرپد ایں کہ لاء کالج ءَ چُشیں سیاسیی چاگردے نہ بوتگ ءُ انگت ءَ نیست انت، گڑا اے وڑیں جاھاں سیاسی گل ءِ زمہ واری بیت کہ اود ءَ سیاسی چاگرد ءِ ودی کنگ ءِ زمہ واری بیت، مئے ھم زمہ واری ھمیش انت کہ ما اد ءَ سیاسی چاگردے ءِ جوڈ کنگ ءُ گیش ءُ گھتر کنگ ءَ جھد بکن ایں۔ مارا وتی نوک ھوار بوتگیں باسکانی تربیتی اَمل ءِ سر ءَ گیش ءَ چه گیش کار کنگی اِنت دانکہ نوکیں باسک نودربر سیاست ءِ لوٹاں شریں ڈولے ءَ سر پد بہ بنت ءُ وت ءَ گوں نودربر سیاست ءَ ھمگرنچ کنگ ءَ سوبین بہ بنت۔
گڈسر ءَ آئی ءَ گوشتگ کہ ما ءُ شما درسیں سنگت سیاسی باسک ایں ءُ سیاسی باسکے ءِ واست ءَ المی اِنت کہ آ اَملی رنگ ءَ بلوچ سیاسی جھد ءِ توک ءَ وتی کرد ءَ پیلو بہ کنت۔ سنگت ءَ گُشت کہ وانگ ءُ زانگ ھما چیز اِنت کہ آ مارا اَمل پرما اِیت ءُ یک مھکمیں سیاسی باسکے جوڑ کنت۔
شنگ بیتگیں درشان ءَ گوشگ بیتگ دیمتری ایجنڈا ھندی ءُ میان استمانی سیاسی جاورھال اَت۔ اے سرھال ءِ سر ءَ سنگتاں تران کت ءُ میان استمانی سیاست ءُ ھندی سیاست ءِ سر ءَ گپ کرت ءُ اسرائیل ءِ فلسطین ءِ سر ءَ ارش ءُ انوگیں حماس رھشون یحییٰ سنوار ءِ کشگ ءِ سر ءَ وتی وتی زانت ءُ ھیال ایر کرت انت۔ سنگتاں گُشت کہ اسرائیل حماس ءِ کاؤنٹر کنگ ءِ واست ءَ گازہ ءِ تہ ءَ انسانی اُگبالانی پامالی کرتگ ءُ انگت ءَ کنگ ءَ انت، ھزارانی کچ ءَ مردم مرگ ءِ آماچ بوتگ انت، اسپتال ءُ ایندگہ جاھاں مردماں کشگ ءَ انت، بلے ایشی ءَ انگت ءَ چشیں جُست ءُ کنوک نیست۔ ایشی ءِ سبب ءَ چہ بگند ئے زوت ءَ مزنیں جنگے مہ بیت بلے ریجنل جنگ ءِ راہ ءُ در پچ انت ءُ انگت ءَ بوگ ءَ انت۔
آئی ءَ گوشتگ کہ انوگیں وھد ءَ دگنیا ءِ توک ءَ بازیں جنگے جنزگ ءَ اِنت۔ فلستین ءُ اسرائیل ءِ جنگ بہ بیت یا کہ انوگیں ایران ءُ اسرائیل ءِ دومی ءِ سر ءَ اُرش بہ بنت، یاکہ حضب اللہ ءُ اسرائیل ءِ جنگ ایشاں تیوگیں دنیا ءِ سیاسی چِست ءُ ایرانی سر ءَ وتی سان دور داتگ۔ ایشانی سبب ءَ دگنیا ءِ مستریں سیاسی ڈسکشن ھمیش انت ءُ ھمیشانی سر ءَ سیاسی چست ءُ ایری بازیں جاھاں ھست ءُ بازیں ریاستانی تہ ءَ کہ مزن ءُ کسانیں راجی جنز ھست انت اے وڑے نہ وڑے ءَ سانمند بوتگ انت ءُ جاہ نہ جاھے ءَ چیر ترّ اِتگ اَنت۔
آئی ءَ گوشتگ راجی جنزاں گوں ھوار چین ءُ تائیوان ءِ وڑیں جھانی جنگ ءِ بھر ءُ روس ءُ یوکرائن ءِ جنگ ھم سیاسی ڈسکشن ءِ تہ ءَ چہ در آیگ ءَ انت۔ سنگت ءَ گُشت کہ مروچی ھمے اسرائیل ءِ بندات کرتگیں جنگ کہ وتی ریاست ءَ ودّینگ ءِ جھد ءَ کنگ ءَ انت، ایشی ءَ چہ سیاسی، لشکری ءُ اکنامی حوالہ ءَ تاگت داروکیں ریاست ھم مروچی ھمے جاہ ءَ اوشتوک انت کہ ما وت ءَ کجام سائیڈ ءِ نیمگ ءَ بیاریں، ایشانی سوب ءَ اے وھد ءَ دگنیا ءِ توک ءَ بازیں راجی جُنز وڈے نہ وڈے ءَ یکشل ءَ سانمند بوتگ اَنت۔ سنگت ءَ دیمتر ءَ تران کت ءُ گُشت; کہ دگنیا ءِ سیاست سرد جنگ ءَ پد (مَلٹی پولر) multi-polar جوڑ بوتگ، مرچی دگنیا ءِ توک ءَ ھر تاگتوریں ملکے وت ءَ ریجنل پاؤرے جوڑ کنگ ءِ جھد ءَ کنگ ءَ اِنت۔ سنگت ءَ گُشت کہ انوگیں وھد ءَ دگنیا ءِ توک ءَ سرد جنگ جنزگ ءَ اِنت ءُ اے سرد جنگ ھما وھد ءَ جھانی جنگ ءِ توک ءَ مٹ بوت کن اَنت وھدے کہ دنیا ءِ بلاھیں پاور بزانکہ امریکہ، چین ءُ روس ءِ وڑیں ملک دیم پہ دیمی جنگانی آماچ بہ بنت۔
گڈّی بنگپ ءَ آؤکیں گامگیج اَت کہ آئی تہ ءَ گوستگیں بُنزھی کابینه ھلاس کنگ بوت ءُ نوکیں بُنزھی کابینه گچین کنگ بوت۔ نوکیں کابینہ ءِ تہ ءَ خلیفہ بلوچ بُنزھی کارمستر، حلیم بلوچ کمک کارمستر ، اعتزاز بلوچ کارگشاد، نادیہ بلوچ کمک کارگشاد ءُ اکرم بلوچ ھالرسانی کارگشاد گچین کنگ بوت اَنت۔
ھنکینی باسک ءَ نوک گچین بوتگیں کابینه ءِ سنگت سوگند دات اَنت ءُ نوکیں بنزھی کارگشاد ءَ چه بنزھی کارمستر ءِ رزا ءَ چه دیوان ءِ ھلاسی ءِ جار جَتگ-