تربت : زورانسری آوار جنیانی ھلاپ ءَ روانک ءُ نندانک، مھلوک ءِ مزنیں کچے ءَ بھر زرتگ

بلوچ یکجھتی کمیٹی ءِ بُنجاھی جار پد ءَ تربت ءَ زورانسری بیگواھیں مردمانی یل کنائینگ ھاتر ءَ زھرشانی ئیں روانک کش اِتگ ءُ فدا شھید چوک سر ءَ نندانک داتگ-

روانک ءَ ھواریں مردماں شھر ءِ جتاجتائیں دمکاں پند بُران تُرندیں ناراہ جتگ، آیاں بیگواھیں مردمانی اکس چست کتگ اَنت وھدے کہ روانک ءَ زالبول ءُ زھگانی مزنیں کچے ءَ ھوار بیتگ اَنت-

روانک ءِ آسر شھید فدا چوک سر ءَ زھرشانی ئیں نندانک داتگ اود ءَ بیگواھیں مردمانی کھول ءَ بلوچ یکجھتی کمیٹی ءِ باسکاں تران کتگ-

نندانک ءَ چہ بلوچ یکجھتی کمیٹی ءِ بُنجاھی راھشون صبغت اللہ شاہ جی ءَ تران کنان ءَ گوشتگ کہ بلوچستان ءِ ھمراھی ءَ کراچی ءُ پاکستان ءِ اے زانشتی ادارہ اود ءَ بلوچ ورنا وانگ ءَ اَنت زورانسری آوار جنی ھمیشگی جوڑ کتگ تھنا اکتوبر ءِ ماہ ءَ پنجاہ ءَ گیش ورنا بیگواہ کنگ بیتگ آیانی تہ ءَ نودربرانی ھمراھی ءَ پولیس ءُ لیویز فورس ءِ کارمند ھم ھوار بیتگ اَنت-

آیاں گوشتگ کہ تربت ءِ لھتے ھنداں نو بیگواھیں مردمانی یل کنائینگ ءِ ھاتر ءَ جُھد ءِ چیدگے جوڑ بیتگ تربت شھید فدا چوک یک انچیں چیدگے اود ءَ ھرچ دومی روچ ءَ مئے گْھار ءَ سرکار ءَ گوں وتی بیگواھیں براتانی یل کنائینگ ھاتر ءَ پریات کن اَنت بلے بژن اِنت سرکار ھچ سما نہ کپ اِیت مئے دیم ءَ بیگواھیں مردمانی یل کنائینگ ھاتر ءَ کمشنر ءُ ڈپٹی کمشنر بازیں رند ءَ دلجمی دیگ ءَ اَبید بیگواھیں مردم یل نہ کتگ اَنت-

آیاں گوشتگ کہ سرکار ءِ سروکی ءَ نو دُزی ءُ ڈنگی ءِ درچ بندات کنگ بیتگ بلیدہ ءَ بینک پُلّگ بیتگ اشی ءَ ساری ھم ھمے بینک ءَ دُزی کنگ بیتگ مروچی بینک ءِ سیکیورٹی گارڈ کشتگ ھالانکہ بلیدہ ءِ درزنانی چیک پوسٹ ءُ چوکی برجم اَنت بلے ھچ دُز گرگ نہ بنت-

آئی ءَ گوشتگ کہ یل کنگ بیتگیں بیگواھیں مردم ءِ تیرگواری ءِ نشانگ کنگ ءِ یک نوکیں درچے بندات کنگ بیتگ دوشی شپ ءَ سنگانی سر ءَ یک مردمے تیرجتگ ءُ ٹپی کتگ کہ آ پیسر ءَ چہ بیگواہ بیتگ پد ءَ آ آجو بیتگ وھدے کہ مروچی آمیدگس ءَ اشی ءِ پیشی بیتگ – نو بلوچ ءِ گوم ءَ دُژمنی کنگ بیگ ءَ اِنت بلوچ نام سر ءَ مئے چکاں آوار جنی ءِ دْرچ برجاہ بیتگ آیانی سر ءَ تیرگواری کنگ یک تُرسناکی یے – اشی ءَ اَبید بلوچ زالبولاں وتکشتراک نام سر ءَ رسانکدر پیشدارگ اَنت تاں انو بازیں زالبولے وتکشتراکار جوڑ کتگ رسانکدر ءِ دیم ءَ آورتگ اَنت ءُ دروگیں کسہ جوڑ کتگ دگہ انچیں وئیلے آپسر ءَ ھم کنگ جھد کتگ بلے اے زالبول ءَ نہ منّ اِتگ – آئی ءَ گوشتگ بیگواھیں مردماں لب دیگ نام سر ءَ یک کلاگے بندات کتگ بلوچ دود ءَ یک ماتے وتی چُک ءِ لاش پنجاہ لک کلدار ءَ بھا نہ کنت آیاں مئے دود ءِ سرپدی نیست ءُ دیوان جوڑ کن اَنت وت ماں وت نزیکی ءِ ڈرامہ ءُ برات بیگ ءِ پندل ءَ کن اَنت-

آئی ءَ گوشتگ کہ اے وھد ءَ بلوچ توانمندانی دیم ءَ یک ایردستیں راجے ءُ وتی زندمان ھاتر ءِ جھد کنگ ءَ اِنت سوبمندی ھرچ ایردست ءِ ابرمی ھک اِنت ءُ ھک ابرم ءِ نزیک بلوچ ئیگ اِنت ھم-

نندانک ءَ چہ ایڈووکیٹ محراب خان گچکی ءَ تران کنان ءَ گْوشتگ کہ بلوچ سرڈگار ھمے آس کہ روک کتگ اشی ءِ برانز ھمے آس روک کنوک ءَ ماندار اِیت بلوچ وتی توانمند ءُ ھمت سھارگ ءَ گُڈی جنگ ءَ کنگ ءَ اِنت اشی ءِ دارگ ھچ وڑ نہ بیت-

نندانک ءَ چہ بیگواھیں اسد بلوچ ءِ گْھار ءَ تران کنان ءَ گوشتگ کہ آئی ءِ برات دوھزار چاردہ ءَ چہ شال ءَ سی جی ایس کالونی ءَ آوار جتگ ما ایف آئی آر نکش کنائینتگ ءُ مروچی تاں ھرچ پیشی ءَ روگ ءَ ایں آ وانگ واستا شال ءَ شتگ کہ اود ءَ بیگواہ کنگ بیتگ مئے جُھد برات ءِ یل کنائینگ ءِ ھاتر ءَ برجاہ بیت- ما بے وسیں الَم بلے زھرشانی مئے ھک اِنت-

بیگواھیں سھیل بلوچ ءِ گْھار ءَ گوشتگ کہ اکتوبر ءَ پنجاہ مردم بیگواہ کتگ اَنت کہ گیشتر چک ءُ نودربر اَنت- زوراک ءِ ھلاپ ءَ مارا یکجاہ جُھد کنگی اِنت، سھیل یکرندے چہ دازن ءَ بیگواہ کنگ بیتگ پد ءَ دومی ءَ رند ءَ یازدہ اکتوبر ءَ وتی سیادانی لوگ ءَ چہ بیگواہ کتگ ءُ آ مرگی نادُراھی-

بیگواھیں اقبال ء عبدالرحمن ءِ گھار ءَ گوشتگ کہ اقبال دوھزار ھپت ءَ چہ تمپ ءَ بیگواہ کنگ بیتگ ما وانگجاہ ءُ نادُراھجاہ ءِ لوٹ ءَ کنگ ءَ نہ ایں اقبال ءِ زورانسری بیگواھی ءَ یک نیم اُمرے سرجمیں آئی ءَ مردمگری ءِ ھاتر ءَ یل بہ کن اِت-

نندانک ءَ چہ عطا اللہ نور ءِ گھار، بیگواھیں جاوید بلوچ ءِ برات ءُ بیگواھیں یاسر بلوچ ءِ بیگواھیں عبدالمالک برات ءُ بیگواھیں حیات سبزل ءِ گْھار ءَ ھم تران کتگ ءُ براتانی پہ سلامتی یل کنائینگ ءِ لوٹ کتگ-