بلوچ یکجھتی کمیٹی ءِ جارکش گوشتگ کہ لالا وھاب بلوچ ءَ ھوار پنچ سنگتانی دزگیر، زالبولانی سر ءَ لَٹ کُٹ ءُ پُرایمنیں زھرشانی ءَ نزور کنگ ءَ ریاستی زوراکی ءِ بدتریں دَرورے- کراچی پریس کلب دیم ءَ بیتگیں پُرایمنیں زھرشانی سر ءَ پاکستانی سیکیورٹی فورسز نیمگ ءَ چہ زوراکی بلوچ چُکچینی ءِ ھلاپ ءَ چست بیوکیں تواراں ایرموش کنگ ءِ دگہ کڑی یے – اے زھرشانی بلوچستان ءَ برجاھیں زورانسری آوار جنی، انسانی ھکانی لگتمالی ءُ ریاستی زوراکی ءِ ھلاپ ءَ بیتگ، آئی ءِ تہ ءَ زالبول، زھگ، کماشاں ھوار ھرچ پڑ مردماں بھر زرتگ – اے زھرشانی ءِ مول تھنا وتی دوستناکانی یل کنائینگ ءُ بلوچستان ءَ برجاھیں زوراکی ءَ جھان دیم آرگ اِنت-
جارکش ءَ گْوشتگ کہ پاکستانی سیکیورٹی فورسز ءَ ناں تھنا زھرشانی کنوکانی سر بے کساس تاکت کارمرز کتگ بلکیں زالبول ھم لَٹ کُٹ کتگ اَنت- اے یک بژنینگ ءُ درانسانی کارے- مئے کماشیں راھشون لالا وھاب بلوچ ءَ ھوار پنچ دگہ سنگت بے سبب ءَ دزگیر کتگ ءُ آ ِِبے کساس لَٹ کُٹ کتگ اَنت- آیانی ازت کم شرپی کنگ بیتگ ءُ آیانی ھلاپ ءَ دروگیں ایف آئی آر کنگ بیتگ – اے گامگیج اے زالمیں نزام ءِ درچ اِنت- چریشی ءِ مول مئے توار چست کنگ اِنت، بلے راجدپتر گواہ اِنت کہ زلم ءُ زوراکی ءَ راجاں ھچبر بے توار کُت نہ کن ئے – یہ ریاستی زوراکی اے درچ ءِ بھر اِنت کہ ریاست ءَ بلوچستان ءَ دیر اِنت کہ برجاہ کتگ- ھمے ماہ ءَ بلوچستان ءَ زورانسری آوار جنی ءِ وئیلانی تہ ءَ گیشی بیتگ, ءُ بے کساس ورنا، کماش ھاسکار نودربراں زورانسری بیگواہ کتگ اَنت – اے زوراک ناں تھنا میان استمانی انسانی ھکانی سنگین ھلاپ ورزی اِنت بلکیں بلوچ راج ءِ بُنکی انسانی آجوئی ءَ چہ زبھر کنگ جُھد اِنت ھم-
درشان تہ ءَ گوشگ بیتگ کہ ما بلوچ راج ءَ چہ دزبندی کن ایں کہ آ یکجاہ بہ بنت اے زوراک ءِ ھلاپ ءَ بہ اوشت اَنت- مئے کماش، زالبول ءُ ورنا اے زرمبشت ءِ بھر اَنت، ءُ ما ھچ وڑ وتی توار بے توار کنگ ءَ نیل ایں-
گُڈی ءَ گوشگ کہ ریاست ءَ ما تچکیں کلوھے دیگ لوٹ ایں کہ اگاں زُلم زوراکی ءِ اے درچ نہ اوشت اَت – گُڑا بلوچ راج وتی پُرایمن گھگیری ءَ گیش تُرند کنت – ما بلوچ چُکچینی ءِ ھلاپ ءُ وتی ھکانی ھاتر ءَ جُھد ءَ گیش مھم کن ایں، ءُ اے ریاستی زوراکی ءِ ھلاپ ءَ مئے گھگیری اے وھد ءَ تاں برجاہ بیت دانکہ بلوچ راج ھرچ پُسگ وتی سرڈگار سر ءَ مھر نہ بیت- ریاست ءَ را اے یات بیگ لوٹ اِیت زُلم ءِ اُمر ھچبر گیش نہ بیت- بلوچ راج وتی جُھد ءَ برجاہ دار اِیت ءُ زورانسری آوار جنی، لَٹ کُٹ ءُ زوراک مئے جزبگاں ھلاس کُت نہ کن اَنت – بلکیں اے گیش مھکم بنت-