بلوچ زورانسری آوار جنی : کراچی شھدربرجاہ ءِ نودربرانی زھرشانی

بلوچستان ءَ ھوار چہ کراچی ءَ زورانسری آوار جنی ءِ ھلاپ ءَ روانک کشگ بیتگ ءُ زھرشانی نکش کنائینتگ-

گیشیں ھالانی رِد ءَ بلوچ نودربراں زورانسری آوار جنیانی ھلاپ ءَ بلوچستان شھدربرجاہ کراچی ءِ نودربرانی نیمگ ءَ چہ شھدربرجاہ ءَ روانک کشگ بیتگ ءُ زھرشانی نکش کنائینتگ-

نودربراں اے میان ءَ بلوچستان ءَ ھوار دگہ دمگاں چہ زورانسری آوار جنی ءِ نشانگ بیتگیں نودربرانی اکس چست کتگ بیتگ اَنت-

نودربراں اے درگت ءَ گوشتگ کہ ھمے ماہ ءَ چہ کراچی شھدربرجاہ ءُ کراچی ءِ دگہ زانشتی ادارھاں وانوک درزنے ءَ گیش بلوچ نودربر زورانسری آوار جنی ءِ نشانگ کتگ اَنت، مئے لوٹ اِنت کہ نودربراں زوت یل بہ کن اِت دیم ءَ بیار اِت اگاں ناں ھمے سنگتانی یل کنائینگ ھاتر ءَ زھرشانی ئیں زمبشتے برجم دار ایں-

زانگ بہ بیت کہ ھمے ماہ اکتوبر ءَ شست ءَ گیش بلوچ زورانسری آوار جنی ءِ نشانگ کنگ بیتگ اَنت آیانی تہ ءَ گیشتر نودربر ھوار اَنت-

اے وھد ءَ زورانسری آوار جنی ءِ گیشی ءِ ھلاپ ءَ بلوچ گلانی نیمگ ءَ چہ زھرشانیانی دْرچ برجاہ ءَ اِنت وھدے کہ بلوچ یکجھتی کمیٹی ءَ وئیلانی ھلاپ ءَ زھرشانی زرمبشت ءِ برجم دارگ جار جتگ کہ اود ءَ گوستگیں روچاں کراچی ءُ ھب چوکی ءَ زھرشانی روانک کشگ بیتگ-

ھمے وڑ بلوچ زورانسری آوار جنی ءِ ھلاپ ءَ مروچی ھُزدار ءَ روانک کشگ بیتگ ءُ زھرشانی نکش کنائینتگ-