روکپتی بلوچستان ءِ دو جتا جتائیں جاھاں پیش اتکگیں تیرگواری وئیلاں دو مردم بیران بیتگ اَنت-
چہ سراوان ءَ رس اتگیں ھالانی رد ءِ گوستگیں شمبے روچ ءَ سراوان ءِ بازار ءَ پجار نبوتگیں سلاہ بندیں مردماں تیرگواری کُرتگ ءُ مردمے کُشتگ۔
بیران بیتگیں مردم ءِ پجار آبد ء رسول انت کہ آ سراوان ءِ دمگ زنگیان ءِ جھمنند اِنت۔
گیشیں ھالانی رد ءَ شپ ءَ بازار ءِ نیام ءِ پرپٹ سواریں سلاہ بندیں مردماں آ نشانگ کُرتگ ءُ تِچکیں تیرگواری کُرتگ ، تیرگواری ءِ سوب ءَ آں ھپت تیر ءِ زد ءِ کپتگ ءُ جاھی بیران بیتگ۔
کُشگ ءِ سوب ءُ کاتلانی پجار زانگ نبیتگ۔
ھمے ڈول ءَ دلگان ءَ سلاہ بندیں مردمانی تیرگوای ءَ مردمے بیران بیتگ۔
بیران بیتگیں مردم ءِ پجار ولی ء ھدابکش انت کہ آ دلگان ءِ جھمنند اِنت۔
اھوالانی رد ءَ ولی دوشی دلگان ءِ دمگ ھسین اباد ءَ نادراہ جاہ ءِ کرّا گوں وتی گاڑی ءَ تر ءُ گرد ءَ بیتگ کہ دگہ گاڑیے ءَ سوار ءِ سلاہ بندیں مردماں تیرگواری کُرتگ ءُ کُشتگ ۔
کُشگ ءِ سوب ءُ کاتلانی پجار زانگ نبیتگ۔