بلوچستان لبریشن فرنٹ ءِ جارکش ءَ وتی تاکبند (میگزین )اسپر شنگ کُرتگ، اے درگت ءَ بی ایل ایف ءَ وتی ستائی درشان ءِ تہ ءَ گْوشتگ کہ بلوچستان لبریشن فرنٹ ءِ آشوب شنگکاری ءِ نیمگ ءَ پہ ورنایانی پگری ءُ لیکھی ھیلکاری ءَ “اسپر” تاکبند شنگ کنگ بیتگ۔ اے اولی تاکبند اِنت کہ ایشی ءِ تہ ءَ بی ایل ایف ءِ انیگیں ماہ کاروائی ءُ سرپدی چار ءُ گزار، سرجمیں گزارش ھوار کنگ بیتگ ءُ چہ ایشی ءَ ابید ڈاکٹر اللہ نزر ءِ زانشتی کلوہ ءُ بی ایل ایف ءِ جُھد ءِ درگت ءَ گوں دلجمی ءَ نبشتانک ھوار اَنت۔
بی ایل ایف ءِ رد ءَ اے تاکبند ءِ تہ ءَ شھید اختر بلوچ ءِ پُر منگھیں دیمونی ءُ آئی ءِ گرانبھائیں جُھد ءِ درگت ء یک گچینی نبشتانکے ھوار کنگ بیتگ کہ وانوک ءَ آجوئی ءِ جُھد ءِ گْوستانک ءُ شھیدانی گرانبھائیں دیمونیاں پجاروک کنت۔
بی ایل ایف ءَ وتی درشان ءِ تہ ءَ گْوشتگ ما دلجمیں کہ مئے اے اولی لبزانکی ءُ لیکھی کار شُمئے لزت ءُ پھم ءَ ایمنی بکش ایت ءُ چہ شُمئے گرانبھائیں کمک ءَ ما دیمتر ءَ “اسپر” تاکبند ءَ زانشتی ءُ پگری بستار ءَ گھتر ءُ زیبا تِر کن ایں، داں کہ اے پہ بلوچ ورنایاں یک گھتریں راھشونی یے جوڑ بہ بیت۔