بلوچ یکجھتی کمیٹی ءِ سروک ڈاکٹر ماہ رنگ بلوچ ءَ گوشتگ کہ پاکستان ءِ پیپلز پاٹی ءَ ھروھد ءَ بلوچ دشمنیں ٹولی یے بیتگ ءُ ے پاٹی ءَ بلوچانی سر ءَ زُلم ءُ زوراکیاں ریاست ءِ فرنٹ مین ءِ کرد پیلو کرتگ-
ماہ رنگ بلوچ ءَ گوشتگ گوستگیں روچ ءَ کراچی پریس کلب ءِ دیم ءَ بلوچ مات، گوھار ءُ کماشانی سر ءَ بیتگیں لٹ شاپی اے زوراکی ءِ درچ اِنت- کراچی پریس کلب ءِ دیم ءَ بلوچ یکجھتی کمیٹی ءِ پرامن زھرشانی ءِ سر ءَ سندھ پولیس ءُ چیریں ادارھاں زوراکیانی ھما ندارگ کتگ اَنت کہ کجام زانشت ءُ انسانیت ءَ مھر کنوکانی دل ءَ ٹکر ٹکر کن اَنت- بلوچ زالبول، ھروھد ءَ وتی شرپ ءُ ناموس ءِ چیدگ انت کہ آیانی سر ءَ بے رھمیں لٹ شاپی کنگ بیتگ اَنت- آیانی اَرسانی تہ ءَ ھما دردانی چیریں کسہ ھست اَنت کہ گوستگیں ھپت دھکاں چہ بلوچ اوپار کنگ ءَ اَنت – آیانی دستاں چِست بیتگیں بینرز بس کاکدانی ٹکر نہ اَنت بلکین آ مئے واب ءُ مئے زمین ءِ سر ءَ برجاھیں زُلمانی رھشونی ءَ کنگ ءَ اَنت-
آئی ءَ گوشتگ لالا وھاب بلوچ کہ مئے کماشیں رھشون اِنت آئی ءِ سر ءَ لٹ شاپی، آئی ءِ بلوچی کلاہ ءِ کمشرپی، ءُ دزگیری ءَ پد بیگواہ کنگ مئے ناموس ءِ سر ءَ یک ترندیں اُرشے، مئے زالبولانی گشانانی چِکگ، آیانی شرپ ءِ پامال کنگ بلوچ دود ءُ ناموس ءِ سر ءَ یک تچکیں زوراکی یے-
ماہ رنگ بلوچ ءَ بلوچ راج ءَ را دلگوش گور کنان ءَ گوشتگ اے وھد اِنت ما وتی ارساں گھگیری ءَ مٹ بہ کن ایں – اے زوراکی مارا پروشگ ءَ ناں بلکیں وتی ھکانی واستا گیش مھکم کنگ اِنت ءُ اوشتارینگ ءُ ھیل دیگ اِنت- ما زان ایں اے راہ آسان نہ اِنت ءُ اے سپر دراج ءُ ناوش اِنت وھدیکہ یک راجے وتی ھکانی واستا بہ اوشت ایت آئی ءَ ھچ تاکت داشت نہ کنت اِنت-
آئی ءَ گوشتگ مروچی اے زُلم ءُ زوراکیاں ابید مئے ارادو مھکم اَنت – بلوچ زالبول گھگیری ءِ ساہ اَنت ءُ بلوچ راج ءِ جد ءُ جھد زندگ ءُ پرشان اِنت – ما بے توار نہ بہ ایں ما نہ پروش اِنت ما مِڑیں ءُ وتی ھکاں گِریں-
آئی ءَ گوشتگ اے جد ءُ جھد مئے راج ءُ پجار ءُ رژنائیں باندات ءِ جنگ اِنت ایشی ءَ ابید دگہ ھچ نیست اِنت-