روکپتی بلوچستان ءِ دمگ سرباز ءِ ھند بگان ءَ رھیم اباد ءَ برجاھیں ایرانی لشکر ءِ بنجل ءِ سر ءَ سلاہ بندیں مردماں اُرش کُتگ۔
گیشیں اھوالانی رد ءَ دوشیگیں شپ ءَ ایرانی لشکر ءِ گولاک (میل194) بنجل ءِ سرا سلاہ بندیں مردماں اُرش کُتگ۔ اُرش ءَ وتکار ءُ مزنیں توپک کارمرز کُتگ ءُ دا دیر آں تیر ءُ تراکانی توار اِشکنگ بیتگ ۔
دمگی ھالکار ءِ رد ءَ اُرش ءَ چہ پد ایرانی لشکر ءِ بازیں کارندہ آں بنجل یل کُتگ ءُ کوھانی نیمگ ءَ تتکگ اَنت۔
اُرش دا دیر ءَ برجاہ بیتگ ءُ پہ ایرانی لشکر ءِ کمک ءَ دگہ لشکری کارندہ ءَ ھم اُرش جاہ ءَ لوٹائینگ بیتگ کہ سلاہ بندیں مردماں سنگر گپتگ ءُ آں ھم نشانگ کُتگ اَنت۔
اُرش ءِ آسر ءَ ایرانی لشکر ءِ جانی ءُ مڈی ءِ تاوان ءِ گمان اِنت۔
اُرش ءِ زمہ واری ءَ ھچ گلّ ءَ نہ زرتگ۔