بلوچستان ءِ وانگ جاھی مزن وزیر ءَ یک شنگ کُرتگیں درشانے ءِ رد ءَ گوشتگ کہ بلوچستان ءَ اے دو سالانی نیام ءَ اولی تبک ءَ وانوک ءِ نودربرانی لیکگ ءِ بُنیاد ءَ ایرانی پجار تاک داروک ءِ چِل ھزار بلوچ زھگ چہ وانگ ءَ پَش کپتگ اَنت۔
ھسن بروشکی ءَ اے بنیاد ءَ اَبید ریاست ءِ کم کاری ءُ وانگ جاہ ءُ استادانی کمی ءِ لیکگ ءَ گوشتگ کہ اے چِل ھزاریں زھگانی اُمر 6/11 سال اِنت کہ بلوچستان ءَ گیشتر چہ گریبی ءُ جنک زھگانی نہ وانیگ سوب ءَ چہ در برگ ءَ زِبھر بوتگ اَنت۔
پروشکی ءَ گوشتگ گوستگیں سالاں سرجمیں ایران ءَ 216،000 زھگ چہ وانگ ءَ پش کپتگیں پجارگ بیتگ اَنت کہ آھانی تہ ءَ 31،000 زھگ وانگجاھاں دیم دیگ بیتگ اَنت ءُ آدگہ پش کپتگ اَنت۔
زانگ بہ بیت کہ سیستان ءُ بلوچستان ءَ زھگانی وانگ ءُ زانگ ءِ جیڑہ وانگ جاہ ءِ نہ بوگ اِنت ءُ بازیں جاھاں ھم وانگ جاہ ھراب اَنت ءُ یا کہ اُستاد ءِ کمی اِنت ءُ بلوچ راج ءِ نوکیں پدریچ وڑ وڑیں مشکلانی دیمپان اَنت۔
اِیشی ءَ چہ پیسر ھم ایرانی ریاست ءَ جار جتگ ات کہ بلوچستان ءَ 148 ھزار زھگ ءَ وانگجاہ ءَ روگ ءَ چہ پش کپتگ اَنت۔
ھمے رنگ ءَ سیستان ءُ بلوچستان ءِ 50 درسد زھگ چہ تنگدستی ءِ سوب ءَ وانگ ءَ چہ زبھر اَنت۔