چہ پنجگور ءَ زورانسری بیگواھی ءِ آماچ بوتگیں دوئیں براتانی یل کنگ ءِ ھاترا برجاھیں زھرشانی دلجمی دیگ ءَ پد ھلاس کنگ بوتگ۔
پیسریگیں دمگدار ءِ گون ءَ گپ ءُ تران ءَ سی کلاکانی تہ ءَ براتانی یل دیگ ءَ پد کھول ءَ زھرشانی ھلاس کتگ-
زانگ بہ بیت گوستگیں چار روچاں چہ سیاد ءُ وارساں ڈی سی ءِ کارگس ءِ دیم ءَ زھرشانی نندانک داتگ بیتھ۔ گوستگیں روچ ءَ ورناھانی یل نہ کنگ ءِ ھلاپ ءَ زھرشانی روانکے کشگ بیتگ، زالبول ءُ زھگاں ھوار مزنیں کساسے ءَ مردماں اے روانک ءَ بھر زرتگ ءُ زورانسری بیگواھیانی ھلاپ ءَ وتی زھرشانی ریکارڈ کنائینتگ-
ھمے ڈول ءَ آیانی ھمراھی ءَ اے دھرنا ءَ ایندگہ بیگواھیں مردمانی سیاد، دمگی نندوک ءُ سیاسی ءُ چاگردی گلانی باسکاں ھم بھر زرتگ۔
ایشی ءَ چہ پیسر دوئیں براتانی کھول ءَ سی پیک دگ ءِ سر ءَ زورانسری بیگواھیانی ھلاپ ءَ زھرشانی نندانک داتگ بیتگ-
پد ءَ دھرنا ءِ بھر زوروک ءُ واکدارانی نیام ءَ گپ ءُ تران ءَ پد مھتل کنگ بوتگ گپ ءُ تران ءِ وھد ءَ واکداراں گْوشتگ اَت کہ بیست ءُ چار کلاک ءِ تہ ءَ دوئیں براتانی یل دیگ بنت انت بلے دوئیں برات یل دیگ نہ بیتگ انت کہ ایشی ءَ پد دوئیں برات یل نہ بیتگ انت ءُ کھول ءَ پد ءَ زھرشانی نندانک دیگ ءِ جار جتگ بیتگ-