لیاری : یکیں لوگ ءَ چہ چار زالبولانی گُٹ بُرتگیں لاش دزکپتگ اَنت

لیاری ءَ چار زالبولانی گُٹ برتگیں لاش دزکپتگ اَنت، لوگ سروک ءُ دو چکانی ھوار اَنت-

کراچی ءِ دمگ بلوچ دمگ لیاری لی مارکیٹ ءَ یک ماڑی یے تہ ءَ ھپتمی تبک ءَ چار زالبولانی گُٹ بُرتگیں لاشانی ءِ پٹ پول برجاہ ءَ اِنت، لوگ ءِ سروک فاروق ءُ دو چک پولیس ءَ ھوار پٹ پول ءِ واستا دزگیر کتگ اَنت-

لیاری لی مارکیٹ ءَ برجاھیں فلیٹ ءَ چہ یکیں لوگ ءِ چار زالبولانی گُٹ بُرتگیں لاش دزکپتگ اَنت- کشگ بیتگیانی تہ ءَ مات جنک نماسگ ءُ نشار ھوار اَنت-

لوگ ءِ سروک فاروق ءِ گوشگ اِنت کہ من شپ ءَ وتی جنک ءَ یل کنگ ءَ شتگ آں وھدے واتر اتکگ آں گیٹ چہ تہ ءَ کس ءَ پچ نہ کتگ گڑا من چابی ءَ چہ پچ کتگ تہ ءَ پترتگ آں گُڑا دیستگ لوگ بانُک، جنک، نماسگ ءُ نشار ءِ گُٹ برتگیں لاش ایر بیتگ اَنت-

پولیس رِد ءَ سے ماھے چک پلنگ چیر ءَ دزکپتگ-

پٹ پول ءِ تہ ءِ چک بلال دست سر ءَ کٹ نشان ھست اِنت، لوگ ءَ چہ دزکپتگیں کارچ ھم فارنزک واستا راھداتگ اَنت پولیس ءَ لوگ ءَ چہ یک کارچے دزکپتگ-

پولیس رِد ءَ اے وئیل ءَ گمان اِنت کہ کارچ کارمرز کنگ بیتگ، کرائم سین ءَ دزکپتگیں کارچ آپ ءَ چہ شودگ بیتگ، کرائم سین یونٹ ءَ کارچ نوکیں وڑے ءَ چہ فارنزک کن ایں-

پولیس ءَ دیمتر ءَ گوشتگ کہ کارچ ءَ چار رند ءَ ھم بہ شود پد ءَ ھم زانگ بیت کہ کوش ءَ اے کارچ کارمرز بیتگ یا کہ نہ بیتگ- کشگ بیتگیں چاریں زالبول پوسٹ مارٹم کنگ بیتگ اَنت-

پولیس سرجن کراچی ڈاکٹر سمعیہ ءِ رِد ءَ گُٹ ءَ ٹپ ءُ کٹ لگگ ءِ سبب ءَ چاریں زالبول بیران بیتگ اَنت، پوسٹ مارٹم نمونہ دزکپتگ اَنت ، نمونہ کیمیائی تجزیہ ءُ ڈی این اے واستا راہ داتگ اَنت-