زورانسری آوار جنی ءِ ھلاپ ءَ ڈپٹی کمشنر پنجگور ءِ کارگس دیم ءَ نندانک ءَ مروچی ھم برجاہ ءَ اِنت-
گیشیں ھالانی رِد ءَ چہ پنجگور ءَ پاکستانی پوج ءِ دست ءَ زورانسری آوار جنی ءِ نشانگ کنگ بیتگیں دوئیں برات صابر نور ءُ عابد نور ء نور زورانسری آوار جنی ءُ یل نہ کنگ ءِ ھلاپ ءَ کھول ءُ دمگ مردمانی زھرشانی ئیں نندانک برجاہ ءَ اِنت-
دوئیں براتانی یل کنائینگ ھاتر ءَ مروچی چارمی روچ ءَ ھم زھرشانی ئیں نندانک برجاہ ءَ اِنت کہ اود ءَ کھول عابد نور ءُ صابر نور ء یل کنائینگ لوٹ کتگ-
ھمے سال ستمبر ءِ گُڈی ءَ چہ پنجگور ءَ زورانسری آوار جنی ءِ نشانگ کنگ بیتگیں ورنا ءِ کھول گوستگیں چار روچ ءَ چہ نندانک دیگ ءَ اَنت وھدے کہ آیانی ھمراھی ءَ دگہ بیگواھیں مردمانی کھول، دمگی مردم ءَ سیاسی چاگردی گلانی باسک ھم اے نندانک ءَ ھوار اَنت-
گوستگیں روچ ءَ ورنا ءِ یل نہ کنگ ءِ بگیری ءَ زھرشانی روانک کشگ بیتگ ءُ نندانک داتگ، روانک ءَ زالبول ءُ چکاں ھوار مھلوک ءِ مزنیں کچے ءَ بھر زرتگ زورانسری آوار جنی ءِ ھلاپ ءَ وتی زھرشانی نکش کنائینتگ-
پنجگور نندانک ءَ نشتگیں زھرشانی کنوکانی لوٹ اِنت بیگواھیں عابد نور ءُ صابر نور ءَ زوت یل کنگ ءُ دیم ءَ بیار اَنت اگاں ناں مئے زھرشانی ئیں نندانک گیش تُرند کنگ بیت کہ آئی ءِ زمہ وار انتزامیہ بیت-