ڈیرہ بگٹی ءَ پوج ءِ زوراکی برجاہ بیست پنچ ءَ گیش مردم زورانسری بیگواہ – بی آر پی

بی آر پی ءِ بُنجاھی جارکش ءَ وتی یک درشانے ءِ تہ ءَ گْوشتگ کہ گوستگیں چیزے روچ ءَ چہ ڈیرہ بگٹی ءِ جتاجتائیں دمگاں پوجی لشکر کشی ءُ زورانسری آوار جنیانی دْرچ یکشلہ برجاہ ءَ اِنت-

بلوچ ریپبلکن پارٹی ءِ نیمگ ءَ چہ شنگ بیتگیں درشان ءِ رِد ءَ پاکستانی پوج ءَ گوستگیں چیزے روچ ءَ ڈیرہ بگٹی ءِ جتاجتائیں دمگاں چہ بازیں مردمے زورانسری آوار جنی ءِ نشانگ کنگ بیتگ اَنت-

پارٹی رِد ءَ ڈیرہ بگٹی ءِ جتاجتائیں دمگاں پوجی لشکر کشی ءُ لوگانی سر ءَ بیڑ وھد ءَ پاکستانی پوج گوستگیں چیزے روچ ءَ چہ بگٹی ٹک ءَ چہ سیادی داروکیں مردماں آوار جنگ ءُ ناشناسیں جاھے ءَ برگ ءَ اِنت-

بی آر پی رِد ءَ پاکستانی پوج ءِ دستاں زورانسری آوار جنی نشانگ بیتگیں مردمانی تہ ءَ لیویز ایس ایچ او طارق بگٹی، آئی ءِ برات مرتضیٰ بگٹی، آئی ءِ سیاد رئیس بگٹی ھوار اَنت وھدے کہ اشی ءَ اَبید چہ ڈیرہ بگٹی ءَ دگہ مردم زورانسری آوار جنی ءِ نشانگ کنگ بیتگ اَنت-

بلوچ ریپبلکن پارٹی ءَ وتی ایکس اکاؤنٹ سر ءَ درشان شنگ کتگ گْوشتگ کہ مروچی ڈاکٹر وزیر ء میشو بگٹی زورانسری آوار جتگ وھدے کہ مروچی سھب ءَ پاکستانی پوج ءَ چہ ڈیرہ بگٹی کسان سالی ئیں ورنا زاھد ء عثمان بگٹی آوار جتگ –

آئی ءَ گوشتگ اشی ءَ اَبید شپ وھد ءَ ٹیکہ خان بگٹی ءِ چک قاسم پاکستانی پوج ءَ چہ ڈیرہ بگٹی ءِ شھر ءَ آوار جتگ ءُ بیگواہ کتگ-

بی آر پی رِد ءَ گوستگیں چیزے روچ ءَ پاکستانی پوج ءُ چیریں ادارھاں ڈیرہ بگٹی ءِ جتاجتائیں ھندانی سر ءَ بیست پنچ ءِ نزیک ءَ دمگی بگٹیانی سر ءَ بیڑ ءَ زورانسری آوار جتگ اَنت آیانی تہ ءَ دمگی لیویز کارمند ھم ھوار اَنت-

آئی ءَ گوشتگ کہ فضل حسین ء میر دوست بگٹی اشانی تہ ءَ ھوار اِنت کہ پاکستانی پوج ءَ گوستگیں شپ ءَ ڈیرہ بگٹی شھر ءَ بیڑانی وھد ءَ زورانسری آوار جنی ءِ نشانگ کتگ – اشی ءَ اَبید زورانسری آوار جنی ءِ نشانگ کنگ بیتگینانی تہ ءَ پراھو بگٹی ء طاہو خان بگٹی، برکت بگٹی ھوار اَنت-

زانگ بہ بیت کہ بلوچستان ءَ یکرندے پد ءَ لشکر کشی ءُ زورانسری آوار جنیانی تہ ءَ گیشی گندگ آیگ ءَ اِنت ڈیرہ بگٹی ءَ ھوار، کلات ، مستونگ، نوشکی ءَ لشکر کشی ءِ دْرچ یکشل ءَ برجاہ ءَ اِنت وھدے کہ مروچی تربت کش گور دمگاں ھم مزنیں کچے ءَ پیشگامی کنگ ءَ گندگ بیتگ-

چہ ڈیرہ بگٹی ءَ زورانسری آوار جنی ءِ نشانگ بیتگیں مردماں اَبید ھمے. یکیں ماہ ءَ بلوچستان ءِ جتاجتائیں دمگاں ھوار کراچی ءُ چہ پنجاب ءَ سی نُھ بلوچ زورانسری آوار جنی ءِ نشانگ کنگ بیتگ اَنت آیانی تہ ءَ سی پنچ انگت بیگواہ ءَ اِنت-