پنجگور ءَ دو براتانی زورانسری بیگواھی ءِ ھلاپ ءَ زھرشانی برجاہ

صابر نور ءُ عابد نور ءِ یل نہ کنگ ءُ زورانسری آوار جنی ءِ ھلاپ ءَ کھول ءُ دمگ مردمانی زھرشانی ئیں نندانک مروچی ھم برجاہ ءَ اِنت-

گیشیں ھالانی رِد ءَ بلوچستان ءِ دمگ چہ پنجگور ءَ بیگواھیں دوئیں برات صابر نور ءُ عابد نور ءِ کھول نیمگ ءَ چہ آیانی زورانسری آوار جنی ءُ یل نہ کنگ ءِ ھلاپ ءَ زھرشانی ئیں روانک کش اِتگ ءُ نندانک داتگ-

روانک ءَ زالبول ءُ زھگاں ھوار راج ءَ مزنیں کچے ءَ بھر زرتگ زورانسری آوار جنی ءِ ھلاپ ءَ تُرندیں ناراہ جتگ ءُ دوئیں براتانی یل کنائینگ لوٹ کتگ-

کھول ءَ گوشتگ کہ مروچی ھژدہ روچ اِنت کہ صابر نور ءُ عابد نور بید جرم ءَ ریاستی آزارجاھاں آزار اوپار کنگ ءَ اَنت-

کھول رِد ءَ ھژدہ ستمبر ءِ سھب ءَ پاکستانی پوج ءَ پنجگور ءِ دمگ تار کارگس ءَ بیڑبرتگ دو برات صابر نور ءُ عابد نور زورانسری آوار جنگ ءَ پد ناشناسیں جاھے ءَ برتگ چریشی ءَ پد دوئیں برات بیگواہ اَنت-

کھول گوستگیں بازیں روچاں چہ زھرشانی ئیں نندانک دیگ ءَ اَنت-

کھول ءَ لوٹ کتگ کہ اگاں صابر ءُ عابد یل کنگ نہ بنت گُڑا مئے زھرشانی برجاہ بیت ءُ ما وتی نندانک ءَ تُرند کن ایں-