انسانی ھکانی پُرکاریں گل بلوچ وائس فار جسٹس ءَ یک ھپتگے ءِ میان ءَ تربت، کراچی، ھب ءُ پنجگور ھژدہ ءَ گیشیں ورنایانی زورانسری آوار جنی ءِ سر ءَ ترس درشان کتگ-
گل ءَ درشان ءِ تہ ءَ گوشتگ کہ بلوچ نودربرانی زورانسری آوار جنی گیشی یک بلاھیں جیڑھے – شانزدہ اکتوبر ءَ چہ کراچی ءَ شعیب، حنیف، اشفاق، شھزاد، بیبرگ، زبیر، قمبر، سعید اللہ ءُ جاوید آوار جتگ اَنت – آیانی کھول یک تُرس زندے ءَ گوزگ ءَ اَنت-
اشی ءَ اَبید گوستگیں روچاں ھم کراچی ءَ پاکستانی پوج ءَ یک ھوٹلے ءِ سر ءَ بیڑبرتگ پنجگور پروم ءِ جھمنندیں چار ورنا، زین بلوچ، ظریف احمد، اکرم بلوچ ءُ انیس بلوچ آوار جتگ ءُ ناشناسیں جاھے ءَ برتگ اَنت- اشی ءَ اَبید علی حیدر ء حاجی نبی بخش ءِ ھُزدار ءِ دمگ چہ کوڑاسک ءَ پاکستانی پوج ءَ گوستگیں شپ ءَ یک ءَ لوگ سر ءَ بیڑبرتگ ناشناسیں جاھے ءَ برتگ-
چہ تربت ءَ زورانسری آوار جنی راست کتگ گل ءَ دیمتر ءَ گْوشتگ کہ عطاءاللہ ء نور بخش، یاسر بلوچ ء حمید اللہ ءُ بلال امام ء امام بخش ھم ریاستی پوج ءَ آوار جنگ ءَ لد بیگواہ کتگ – اے سئیں ورنا ھشت ءَ چہ سیزدہ اکتوبر دوھزار بیست چار ءِ میان ءَ تربت ءِ دمگ چہ کیچ ءَ زورانسری آوار جنی ءِ نشانگ کتگ-
جنئید حمید ھژدہ اکتوبر ءِ شپ ءَ چہ ھب چوکی ءَ وھدے کہ اشی ءِ برات یاسر حمید یازدہ اکتوبر ءَ چہ کلات ءَ بیگواہ کتگ-
بلوچ وائس فار جسٹس ءَ اکوام متھدہ ءِ ورک ٹولی زورانسری آوار جنی، ایمنسٹی انٹرنیشنل ءُ ھیومن رائٹس واچ ءَ گوں دزبندی کتگ کہ آ ریاستی پورس ءِ نیمگ ءَ چہ انسانی ھکانی لگتمالی ءُ زورانسری آوار جنی ءِ گامگیج ءَ بزور اَنت-
گل ءَ دلگوش گور کنائینتگ کہ اکوام متھدہ ءِ جنرل اسمبلی ءِ کولبند 65/209 ءُ 69/180 ءِ رِد ءَ زورانسری آوار جنی ءِ سنگین انسانی ھکانی ھلاپ ورزی اِنت، ءُ ھرچ ڈیھ ءِ اے زمہ واری بیت کہ آ اے وئیلانی گر ءُ دار بہ کن اَنت – شکین دو ءُ چار ءَ تچک کنگ بیتگ کہ : ھرچ مردم درکانودی ھساب ءَ دزگیر یا بیگواہ کنگ ءِ ھلاپ ءَ پھاز دیگ بہ بنت- شق چار ءَ گوشگ بیتگ کہ ریاستی زورانسری آوار جنی ءِ وئیل ءِ پٹ ءُ پول کنگ ءُ آیانی ھلاپ ءَ کانودی گامگیج زورگ ءِ زمہ واری اِنت-
گل ءَ ھشدار داتگ کہ انسانی ھکانی گلانی نیمگ ءَ چہ بلوچستان ءَ بیوکیں زورانسری آوار جنی ءُ انسانی ھکانی پادمالی ھیال ندارگ یک سنگینیں انسانی ترسے ودی زرتگ-