چہ کراچی ءَ ھشت بلوچ نودربر پاکستانی پوج ءِ دست ءَ بیگواہ

پاکستانی پوج ءَ چہ کراچی ءَ ھشت بلوچ نودربر آوار جتگ ءُ بیگواہ کتگ اَنت-

چہ کراچی ءَ بیگواہ کنگ بیتگیں مردمانی پجّار زبیر شوکت جھمنند کیچ مند ، بیبگر امیر جھمنند وشبود پنجگور، اشفاق خالقداد جھمنند نال ھُزدار، شھزاد خالد جھمنند نال ھُزدار، کمبر علی جھمنند نال ھُزدار، حنیف بدل جھمنند اورماڑہ، شعیب علی بختیار جھمنند پسنی ءُ سعید اللہ جھمنند گڈانی ناماں چہ بیتگ اَنت-

اے سرجمیں مردم کراچی ءَ وانگ ءَ اَنت، اشانی تہ ءَ شعیب ءُ بیبگر کراچی یونیورسٹی ءَ تاریک ءِ، حنیف فیڈرل اردو یونیورسٹی ءَ ، اشفاق ءُ شھزاد مدرسہ ءَ، کمبر ایف اے سی ءُ سعیداللہ کانود ءِ نودربرے-

اے نودربر پاکستانی پوج ءَ کراچی ءِ دمگ چہ گلشن ءَ آوار جتگ ءُ ناشناسیں جاھے ءَ برتگ اَنت-

زانگ بہ بیت چیزے روچیں کراچی ءَ بلوچانی زورانسری آوار جنی ءِ تہ ءَ گیشی گندگ آیگ ءَ اِنت ، گوستگیں روچ ءَ کراچی ءِ دمگ صدر ءَ یک ھوٹلے سر ءَ بیڑبرتگ پاکستانی پوج ءَ چار مردم آوار جتگ ءُ بیگواہ کتگ اَت-