ایمنسٹی انٹرنیشنل ءَ گشتگ کہ انسانی ھکانی برجاھیں لگتمالی ءِ سبب ءَ 17 ءُ 18 اکتوبر ءَ جنیوا ءَ میان استمانی انسانی ھکانی کمیٹی ءِ نیمگ ءَ پاکستان ءِ دومی چار ءُ ٹپاسی کنگ بوگ ءَ انت۔
اے چار ءُ ٹپاسی شھری ءُ سیاسی ھکانی بابت ءَ میان استمانی مسام ءِ چیر دستی ءَ بیت کہ ایشی ءِ سر ءَ پاکستان دسھت کتگ۔
ایمنسٹی ءِ ڈپٹی ریجنل ڈائریکٹر برائے جنوبی ایشیا ءِ بابو رام ءَ گشتگ کہ اے چار ءُُ ٹپاسی ھما وھد ءَ کنگ بوتگ کہ پاکستان ءَ انسانی ھکانی لگتمالی مزنیں کچے ءَ بوگ ءَ انت۔
پولیس ءِ نیمگ ءَ پہ توہین رسالت ءَ، امن ءِ زھرشانی کنوکاں کریک ڈاون، 2024 ءِ اسمبلی ءُ پبلک آرڈر ءِ قانون ءِ نپاز، اپوزیشن ءِ جھدکار ءُ سروکانی مزنیں کچے ءَ دزگیر کنگ، پشتون تھپز ءِ جنبش ءِ سر ءَ بندش، ءُ ماہ رنگ بلوچ ءِ وڑیں انسانی ھکانی داروکانی ترسینگ ءِ وئیل ایوک ءَ گوستگیں ماہ ءَ رپورٹ بیتگ اَنت-
بابا رام پنت ءَ گشتگ کہ اے چار ءُ ٹپاسی پاکستانی حکومت ءِ واستا یک موھے پیش کنت کہ آ ملک ءِ تہ ءَ انسانی ھکانی جاور ھال ءِ سر ءَ چار ءُ ٹپاسی بہ کنت ءُ چار ءُ ٹپاسی ءِ وھد ءَ چست بوتگیں انسانی ھکانی جیڑھانی گیش ءُ گیوار کنگ ءِ ھاترا جوانیں گامگیج بہ زور ایت۔
پشتون تھپز مومنٹ ءِ بندش ءَ را گیر کانونی ءُ گیر آئینی لیکگ ءَ ایمنسٹی انٹرنیشنل ءَ پی ٹی ایم ءِ سرا بندش ءِ ھلاسی ءِ لوٹ کتگ ءُ اے بندش ءَ را شھری آجوئی ءُ امن ءُ ایمنی ءِ ھکانی لگتمالی لیک اتگ۔
ایمنسٹی ءَ گوستگیں ماہ ءَ سندھ ءُ بلوچستان ءَ پولیس ءِ نیمگ ءَ توہین رسالت ءِ شکی مردمانی کُشگ ءِ سر ءَ ”سرجمیں، بے رھبند ءُ آزاتیں“ پٹ ءُ پول ءِ ھم لوٹ کتگ۔
ایمنسٹی انٹرنیشنل ءِ رِد ءَ ماہ رنگ بلوچ ءِ کیس ءَ ھم پاکستانی نمائندہ ءِ دیم ءَ ایر کن اَنت کہ اودا گوستگیں ھپتگ ءَ بلوچ انسانی ھک کارکن ءِ سر ءَ سلاھبندیں گلانی آسراتی ءِ بھتام جنگ بوتگ وھدے کہ پیسر ءَ آئی ءِ سر ءَ امریکا ءِ روگ ءُ آیگ ءَ چہ مکن کنگ بوتگ۔